Atualità

Scora ladina: de plü poscibilités digitales pro la didatica

La scora ladina s’á bele ti mëisc passá fat inant por adoré deplü i stromënc digitai tla didatica. Cun vantaji te chësc momënt d’emergënza.

Media digitai é de gran aiüt por ti dé n pü de continuité ala didatica te chësta situaziun de emergënza (Foto: Paul Hanaoka/Unsplash)

Tles scolines y scores ladines é i media digitai bele da n pez gnüs tuc ite tl insegnamënt da vigni dé. Meton a desposiziun hardware y software nüs, organisan cursc de formaziun por düc i insegnanc y meton sö na rëi plü strënta danter i esperc dl insegnamënt digital, dess chësc svilup gní acompagné y sostigní. Bele tl mëteman dl ann de scora é gnü metüda chësta tematica pro i punc plü importanc dl laur dla Intendënza y Cultura ladina.

L’assessur pro la scora y cultura ladina Daniel Alfreider rengrazia dötes les insegnantes y i insegnanc por la desponibilité da se adaté ala situaziun atuala. "Al é por düc n gran sforz y la scora ladina á tut sö chësc mudamënt cun gran profescinalité y flessibilité", insciö Alfreider. La direturia Edith Ploner vëiga tla didatica digitala na gran ocajiun de svilup por le sistem scolastich ladin y ara recorda che te chësc contest él ince important da ti insigné ai mituns y ales mitans, ales jones y ai jogn da adoré dërt chisc mesi digitai.

Inrescides sön internet, register digital y clouds

Te chësc momënt particolar é chësc n gran vantaje por les scores, che pó tó ca les esperiënzes fates cun i stromënc digitai de didatica y i svilupé inant. Inrescides sön deplü tematiches, sistems cloud, register digital y tröc d’atri stromënc é bele gnüs adorá, d’atri programs sciöche Office365 y deplü apps tl ciamp dla didatica vëgn tl momënt porvá fora.

Conferënzes online y education tools

Sëgn che les scores é stlütes por gauja dl coronavirus, á les scores la poscibilité da damané do n account de Office365 por les scolares y i scolars. Sön chësta plataforma vara da mené inant y partí fora material d’insegnamënt. An á ince la poscibilité da organisé conferënzes online cun l’aplicaziun Teams. Düc i Office education tools y i programs Office en general pó gní anuzá online o gní desciarí jö sön le computer.

Sostëgn digital

Cinch insegnanc dla scora todëscia che s’á spezialisé tla didatica digital é ince a desposiziun dles scores ladines. Ai á chirí adöm na linia de plataformes, apps y links interessanc por la didatica a destanza. Por les cuestiun tecniches y por domandes sura i accounts internet y l’infrastrotöra él la Repartiziun Informatica che pó respogne.

Te chësc momënt vëgn tuc ca y porvá fora chisc modei inovatifs d’insegnamënt. Direturies, direturs, maestres y maestri se dá da fá y se dá jö cun impëgn por porté inant chisc stromënc nüs, mo datrai vëgni tignís sö da problems sciöche la mancianza dl dër hardware tles families o, te valgügn paisc dles valades ladines, da n coliamënt internet massa pëigher. Mo cun sensibilité pedagogica y conescënzes d’organisaziun vara prësc te vigni scora da jí sura chëstes dificoltés fora.

USP/USP

Galaria dales fotografies