Atualità

Museum Ladin: Presentaziun dl film „Integra“ ai 23 de setëmber

En sabeda ai 23 de setëmber mostra le Museum Ladin le documentar “Integra” che trata dl’istalaziun de Lois Anvidalfarei tl ander de Conturines.

L'istalaziun Integra dl artist Lois Anvidalfarei - Foto: USP/Museum Ladin/G. Willeit

Le raport compliché danter la natöra y la porsona é öna dles tematiches prinzipales dl’istalaziun artistica “Integra” che é gnüda realisada da Lois Anvidalfarei a 2.750 metri sura le livel dl mer tl ander de Conturines, tl Parch natural Fanes-Senes-Braies. Le ander é conesciü dantadöt por la scoverta de osc dla laurs preistorica “Ursus ladinicus” tl ann 1987. Tl ander él da odëi döes scoltöres de metal coliades l’öna cun l’atra. Le titul latin dla mostra “Integra” fej referimënt ala locuziun “loco integra” ("posć nia desfac") porvan da colié l’opera d’ert cun le post dl’istalaziun, respetan insciö la storia y la formaziun dl ander. La creaziun artistica de Anvidalfarei vëgn arichida da n test dl scritur Erri de Luca.

L’istalaziun é ince la tematica zentrala de n film che gnará presenté en presënza de Anvidalfarei en sabeda ai 23 de setëmber dl 2017. Al se trata de n documentar realisé da Matteo Vegetti dal Piemont sön inciaria dl Museum Ladin.

Le documentar “Integra” sará da odëi

en sabeda, ai 23 de setëmber,

dales 10:30

tla sënta dl Museum Ladin “Ursus Ladinicus”

strada Micurá de Rü 26

a San Ciascian.

Por informaziuns plü monüdes prëibel contaté l’aministraziun dl Museum Ladin al numer 0474 524020, info@museumladin.it

USP

Galaria dales fotografies