Atualità

Scora ladina: Contlujiun dl ann de scora y de scolina

Ai 16 de jügn se röia ofizialmënter l'ann de scolina y scora che é gnü manajé te na situaziun de emergënza y de colaboraziun danter scora y families.

Contlujiun dl ann de scora y de scolina (Foto: freepik.com)

En mercui ai 16 de jügn él ofizialmënter la fin dl ann de scolina y de scora 2020/21 por les scolines, scores elementares y mesanes. Bele incö vëndres 11 de jügn él gnü stlüt jö l’ann scolastich por les scores altes y profescionales. Indöt é stades scrites y scric ite 3.012 mitans, mituns, scolares y scolars te na scolina o scora ladina.

L’assessur por la scora ladina Daniel Alfreider dij: “Al é sté n ann cun tröpes desfides y porchël oressi rengrazie düc y dötes che che á daidé da garantí l’insegnamënt. Sides les direturies y i direturs, co ince i insegnanc y les insegnantes á porvé da mantigní n bun contat cun les families por acompagné le miú che ara jô les mitans y i mituns, les jones y i jogn sön so tru formatif”.  L’ann de scora 2020/21 ne é nia sté n ann saurí por dötes les componëntes dles comunités scolastiches. “Impó é le sistem formatif ladin sté bun da garantí acompagnamënt, sostëgn y formaziun ales mitans y ai mituns de nostes valades. Les tröpes esperiënzes fates en chësc ann daidará ince da svilupé inant metodologies nöies por l’insegnamënt tl dagní”, á dit l’assessur.

L’intendënta Edith Poner á sotligné che la scora ladina á podü pité l’orar plëgn zënza renunzié al domisdé. “Dilan ales direturies y ai diretures y a sü teams cun personal nia insegnant che á manajé la situaziun de emergënza, a dötes les dependëntes pedagogiches dla scolina, insegnantes y insegnanc de vigni ordin scolastich che á dé le miú por chësc ann de formaziun y nia en ultima a scolares y scolars y a sües families che á respeté les regoles tratan chësc ann straordinar”.

L’assessur y l’intendënta ti fej a düc i scolars y les scolares che stlüj ciamó jö l’ann scolastich cun n ejam le mius aodanzes de na buna contlujiun.

Scolines y scores ladines: 3.012 iscriziuns

Indöt é stades scrites y scric ite 3.012 mitans, mituns, scolares y scolars te na scolina o scora ladina. 660 mitans y mituns á frecuenté öna dles 17 scolines dles valades ladines, 1146 scolares y scolars é stá scric ite te na scora elementara ladina y 682 te na scora mesana ladina. Tl ann de scora 2020/21 á 482 scolares y scolars frecuenté na scora alta ladina y 42 la scora profescionala Cademia.

Indöt él 91 studëntes y studënc che s’arjigna ca ai ejams de Stat do la cuinta classa dla scora alta y che á fat la scora profescionala Cademia. 240 scolares y scolars á indöt  frecuenté la terza classa de na scora mesana ladina y se presentará tosc al ejam de Stat dla scora mesana.

Ejam de Stat: scomenciamënt ai 16 de jügn

Les proes metará man ai 16 de jügn dl 2021 cun n ejam a usc strotoré. Al ne gnará fat degönes proes scrites. A scomenciamënt dla proa a usc gnarál traté n elaborat scrit arjigné danfora dales studëntes y dai studënc y dales scolares cun l’acompagnamënt de n tutor. Te chësc laur scrit nen vará dantadöt dles materies tipiches de vigni singula scora che é gnüdes stabilides tres le Minister dl’Istruziun por döta la Talia. La forma pó ester desfarënta aladô de vigni orientamënt scolastich. Tl ejam gnarál dedô analisé tesć che é gnüs tratá ia por l’ann y che sará un por todësch y l’ater por talian.

L’ejam a usc jará spo inant cun la discusciun de materiai d’impuls y cun domandes da pert dla comisciun . Al gnará ince valuté les competënzes tl ciamp dl’ “Educaziun zivica” che vëgn tratada te deplü materies. Tles scores altes ladines gnarál tigní na pert dl ejam ince por ladin.

USP/rc

Galaria dales fotografies