La pandemia da Coronavirus á arlungé cotan i tëmps d’aspeta di ejams de conescënza di lingac talian y todësch. Por smendrí chisc tëmps y garantí insciö n desfiramënt regolar di ejams, él gnü porté ite val’ mudaziuns cun la deliberaziun dla Junta di 14 de jügn dl 2022, n. 405 che reverda sides l’aspet organisatif che la strotöra di ejams.
Assënzes le de dl ejam, sburlé y antizipé la data dl ejam
Sce i ne sciafiëis nia da gní a fá l’ejam messëise desdí l’ejam. I messëis desdí altamo trëi dis da laur dan la data dl ejam, ater co por rajuns cumprovades (por ej. maratia atestada cun n zertificat dl dotur). Sce i ne lascëis nia alsavëi che i ne gnëis nia a fá l’ejam trëi dis denant, gnëise stlüt/stlüta fora dai ejams por sis mëisc y i ne podëis no ves scrí ite a n ejam no damané da fá denant l’ejam por sis mëisc.
La data dl ejam pó ma gní sburlada un n iade do l’avëi lascé alsavëi altamo trëi dis da laur dan la data dl ejam.
Por ti garantí a dötes les porsones scrites ite ai ejams les medemes poscibilités d’azes y schivé che i tëmps d’aspeta vëgnes massa lunc, vëgnel limité la porcentuala mascimala de candidates y candidac che pó antizipé la data dl ejam por tó pert a n concurs publich che toma tosc.
Novités sön le desfiramënt di ejams
L’ejam monolingual ne vëgn nia plü fat te grups linguistics moscedá; i grups vëgn partis sö aladô dl lingaz. Por chësta rajun sará les comisciuns dl ejam monolingual metüdes adöm da döes comissares/comissars impede cater.
Por otimisé les prozedöres d’ejam, él gnü smendrí la dorada de proes singoles sides dl ejam de bilinguism che dl ejam monolingual.
Na novité importanta reverda le sotrissé sön les plates de laur: sce i sotrissëis val’ sön la plata de laur ne vëgn osc laur nia plü anulé.
An pó ti ciaré a döt le test dla deliberaziun tla seziun de download jödapé dla plata.
