Atualità
Ancunteda de cunlaurazion danter Ntendënza ladina y Scola de Fascia
Tla Ntendënza ladina a Bulsan iel unì a se l dé n’ancunteda danter la Ntendënta Edith Ploner y l sëurastant dla Scola ladina de Fascia Federico Corradini.
Tematiches de atualità tl mond dla scola ladina y la ndesfidedes dl daunì a livel pedagogich i argumënc prinzipei dl’ancunteda danter la Ntendënta Edith Ploner y l Sëurastant dla scola ladina de Fascia Federico Corradini tla sënta prinzipela dla Ntendënza ladina a Bulsan. L fin dl’ancunteda fova chël de se giamië ju esperienzes tl ciamp dla scolina y scola ladina dla trëi valedes ladines per udëi ce formes de cunlaurazion che l possa unì a se l dé.
Dantaldut iel unì rujenà dl Ski College, proiet che vën bele purtà inant da 20 ani tla scola ladina de Fascia, y dl nseniamënt dla rujenedes cun atenzion particulera al nseniamënt dl ladin. Per cie che reverda l plurilinguism ti iel unides mustredes a Corradini duta la publicazions dates ora dal Ciamp pedagogich dla Ntendënza ladina ti ultims ani.
Tramedoi pertes à auzà ora de ulëi mëter a jì proiec de cunlaurazion danter i singuli ordens scolastics. “Per l daunì dl sistem scolastich dla mendranza iel mpurtant crië n’unità danter la scoles dla region y tò ite la realtà ladina sëura la Provinzia de Bulsan ora“, nsci la Ntendënta Edith Ploner.
Per l daunì se tolen dant de se ancunté inò regularmënter, do che l’ancuntedes fova unides cundizionedes dala pandemia. La proscima ancunteda unirà a se l dé do Nadel.
Clican chiló röiun ala verjiun originala dl comunicat stampa por visualisé imajes, documënc o video che taca lapró
USP/red
