Atualità

De dla Scora Ladina 2021: La multidimensionalité dl aprendimënt

Le De dla Scora Ldina sará ai 31 de agost sön MS-Teams en presënza dl assessur por la scora Alfreider y dl'intendënta Edith Ploner. La tematica prinzipala é a multidimensionalité dl aprendimënt.

En mertesc ai 31 de agost gnarál organisé le De dla Scora Ladina 2021 cun tl zentër la tematica dla multidimensionalité dl’aprendimënt y dla integraziun efiziënta dla didatica en presënza y a destanza. La manifestaziun gnará tignida online.

La pert zentrala dl De dla Scora ladina 2021, apuntamënt tradizional dl mëteman dl ann de scora, sará inann le referat dl espert Mario Pireddu, professur assozié dl’Université dla Tuscia, dal titul “Le dimensioni spazio-temporali dell’apprendimento: Note per un approccio ecologico alla didattica”. Al gnará ince a se le dé intervënc y parores de salüt da pert dl assessur por la formaziun y cultura ladina Daniel Alfreider, da pert dl intendënta Edith Ploner y da pert dl ispetur dles scores ladines Albert Videsott. L’evënt gnará moderé dal’ispeturia por les scolines ladines Elisabeth Baur.

L’apuntamënt por le De dla Scora ladina é

en mertesc, ai 31 de agost

dales 09:00 inant

online sön MS-Teams.

L’evënt é davert por le personal scolastich, i rapresentanc y les rapresentantes di geniturs y i rapresentanc y les rapresentantes di media.

Por de plü informaziuns prëibel contaté: intendenza-ladina@provinzia.bz.it o Tel. 0471 417003


Clican chiló röiun ala verjiun originala dl comunicat stampa por visualisé imajes, documënc o video che taca lapró

USP/usp