Atualità
Vijites tla Val Badia, Alfreider: “Jí inant cun la digitalisaziun"
La digitalisaziun y le lingaz ladina é stá tl zënter dles vijites tles scores ladines dla Val badia dl assessur Daniel Alfreider y dla intendënta Edith Ploner.
Dles tematiches dla digitalisaziun, di ejams de contlujiun y dl insegnamënt dl ladin nen éra jüda tratan les vijites scolastiches dl assessur por la scora ladina Daniel Alfreider y dl'intendënta Edith Ploner incö vëndres ai 4 de jügn tla Val Badia. Alfreider y Ploner á vijité le Zënter dles scores altes da La Ila, la scora elementara da San Linert y la scora mesana da San Martin de Tor.
Competënzes digitales importantes ince por le dagní
De düc trëi i zëntri scolastics él l'assessur y l'intendënta che á podü costaté i vari inant por ci che reverda l'adoranza di mesi digitai tratan l'insegnamënt. “Do che al é rové la banda leria tl zënter dles scores altes y cun i mesi digitai a desposiziun él sté poscibl da amplié les conescënzes digitales sides dles insegnantes, di insegnanc co ince dles scolares y di scolars”, á dit Alfreider. Tl Zënter scolastich de La Ila él l'assessur che á vijité les cuintes classes cun indöt 22 scolares y scolars che s'arjigna al Ejam de Stat. L'intendënta Ploner á sotligné che chësc ann de scora caraterisé dal coronavirus ti dará ince competënzes ajuntives ales scolares y ai scolars por le dagní. “Tröp é drio a se mudé y os sciöche scolares y scolars podarëis dé osc contribut”, á dit Ploner.
La direturia Elena Pellegrini á dit tratan la vijita che dötes les scolares y i scolars y geniturs á dé süa aprovaziun por i tesć nasai y che chësc é na gran sauridanza por l'insegnamënt en presënza.
Lingaz y cultura ladina fej pert dla identité
L' assessur Alfreider y l'intendënta Ploner á spo vijité la scora elementara da San Linert y la scora mesana da San Martin de Tor en presënza dla direturia Claudia Canins (Badia) y Heinz Videsott (San Martin). De gran importanza é sté la vijita a n'ora de ladin. “Por nos sciöche grup linguistich de mendranza él de gran importanza che le lingaz, la cultura, la storia ladina y insciö na pert de nosta identité fejes pert dl insegnamënt curricular”, insciö Alfreider. Tla scora mesana da San Martin él dötaurela 37 scolares y scolars che se arjigna ca al ejam de contlujiun. Tratan la vijita él ince gnü rajoné dla pücia lerch te n valgönes classes y de soluziuns poscibles.
L' assessur Alfreider y l'intendënta Ploner á orü rengrazié döt le monn scolastich - scolares, scolars, insegnantes, insegnanc, direturies, direturs y families - por le gran impëgn y la dediziun mostrada te chësc ann de scora cun tröpes sfides y chestiuns nia planificades. "Al é sté dötes y düc che á fat le poscibl por garantí l'insegnamënt sides en presënza co da ciasa".
USP/rc
Galaria dales fotografies
