Atualità
Scolines y scores: Iscriziuns por l’ann scolastich 2021/2022
Dai 4 de jená dl 2021 inant él poscibl da scrí ite les mitans y i mituns tles scolines, dai 7 por la pröma classa dla elementara y dai 15 de jená por les scores altes.
En previjiun dl scomenciamënt dl ann de scolina y scora 2021/22 comunichëia les trëi Direziuns provinziales por les scolines y scores ladines, todësces y talianes che l’iscriziun di mituns y dles mitans tles scolines y dles scolares y di scolars ales scores (elementares, mesanes, altes y scores profescionales) mëss gní fates cun la modalité online. L’iscriziun vëgn fata tres le sorvisc online dl’aministraziun provinziala myCivis anter i termins dá dant dessot; le sorvisc pó gní anuzé tres chësc link sön le portal MyCivis.Chësta plata internet pita dötes les informaziuns che an adora por les iscriziuns. L’azes al sorvisc é poscibl tres SPID o cun la Cherta di sorvisc ativada (cherta sanitara börna cun software y letur).
Termins por dé ite les domandes de iscriziun
I termins por fá les domandes de iscriziun online ales scolines vá dai 4 ai 14 de jená dl 2021. Al pó gní scric ite mituns y mitans che complësc i trëi agn d’eté cina ala fin de dezëmber dl 2021. L’iscriziun pó gní fata ma te öna na scolina. Al sará por le pröm iade poscibl da fá les iscriziuns ma tres le portal IOLE. L’azes al sorvisc online pón fá tres l’iscriziun cun SPID o cun la Cherta di sorvisc.
Por ci che reverda les scores elementares é i termins por fá les iscriziuns dai 7 ai 24 de jená dl 2021. I geniturs o les porsones responsables por l’educaziun mëss scrí ite ala 1. classa dla scora elementara les mitans y i mituns nasciüdes/nasciüs dai 01.09.2014 ai 31.08.2015. Les mitans y i mituns nasciüdes/nasciüs dai 01.09.2015 ai 30.04.2016 pó gní scrites/scric ite ala 1. classa dla scora elementara.
Les iscriziuns dles mitans y di mituns tles atres classes dla scora elementara vëgn fates d’ofize.
Por la scora mesana vëgn les mitans y i mituns dles 5. classes dla scora elementara scrites/scric ite d’ofize tla pröma classa dla scora mesana dla respetiva direziun raionala. I geniturs y les porsones responsables por l’educaziun dla möta/dl möt pó damané le trasferimënt te n’atra scora mesana.
Por ci che reverda les scores altes y profescionales é i termins por dé jö les domandes dai 15 de jená ai 15 de forá dl 2021. I geniturs o les porsones responsables por l’educaziun dla möta/dl möt scrí ite les mitans y i mituns ala 1. classa dla scora alta o profescionala. Les iscriziuns tles classes plü altes vëgn fates d’ofize.
Ales families che n’á degun computer o degöna conesciun internet ti pita l’istituziun scolastica, a chëra che al ti vëgn mené la domanda d’iscriziun, n computer y i injins nezesciars por fá l’iscriziun.
Por de plü informaziuns pón contaté i ofizi dl’Intendënza y Cultura ladina al numer de telefon 0471 41 70 00 o tres email: intendenza-ladina@provinzia.bz.it
I sorvisc de iscriziun pó gní consultá sot a: https://my.civis.bz.it/public/de/online-einschreibung-schule.htm
USP/rc
