Atualità

Ponsiun complementara: N contribut da pert dla Regiun por i artisć

500 euro al ann ciafará artisć y artistes dala Regiun che ó ativé na ponsiun compelmentara. I cater assessurs por ala cultura dla Regiun sotlignëia l'importanza dla mosöra.

Ponsiun complementara: N contribut da pert dla Regiun por i artisc y artistes (Foto: Unsplash)

Cun 500 euro gnarál sostigní dala Regiun i artisć y les artistes tl Südtirol y tl Trentin. Le dessëgn de lege é gnü aprové incö ai 18 de novëmber dal Consëi regional.

I assessurs Daniel Alfreider, Philipp Achammer y Giuliano Vettorato adöm cun l'assessur por la cultura Mirko Bisesti dij de ester contënc dl'aprovaziun dla lege por ci che reverda la ponsiun compelementara di artisć y artistes. Por i assessurs él n vare concret por sostigní le setur dla cultura cun n contribut de 500 euro por artisć y artises che á intenziun da ativé na ponsiun complementara, dantadöt ince te na situaziun plëna de dificoltés sciöche dötaurela.

Por l'assessur por la cultura ladina Alfreider é chësc n vare important “por sostigní ince te na manira economica i artisć y les artistes te na situaziun de dificolté y implü él nosc obietif da renforzé la profescionalité te chësc setur”. Por l'assessur por la cultura todëscia Achammer él gnü arjunt n resultat important por la cultura locala. “Tla Talia ne él degun fonds sozial dla ponsiun por artisć. Cun chësta mosöra unse orü curí chësta locia”, insciö Achammer.  L'assessur por la cultura taliana Vettorato recorda che chësta mosöra fej pert de na lingia de scomenciadies a sostëgn dla cultura, ince porvia dla situaziun de pandemia che á atoché le setur.

Tla categoria de artisc él n gröm de laurs che toma ite sciöche por ejëmpl i scriturs, i aturs, i depenjadus, scolturs y scenografisc. Chisc vëgn nominá te regolamënc provinziai aposta.  Por avëi le dërt da se anuzé dl contribut mëss le artist o la artista ester residënt/a da almanco dui agn tla Regiun, fá sües ativités en gran pert tla Regiun y avëi na certa posiziun economica. Les modalités plü avisa vëgn ciamó laurades fora a livel provinzial. L'atuaziun de chësta mosöres dess gní a se le dé tl 2021, al é preodü n import complessif de 500.00 euro por chësta mosöra por l'ann 2021. 

USP/eb/jw

Galaria dales fotografies