Atualità

Contlujiun de n ann de scora particolar

Indoman ai 16 de jügn se röia ofizialmënter l'ann de scolina y scora che gnará recordé porvia dla stlüta antizipada dl insegnamënt en presënza a gaujia dla defujiun dl coronavirus nü.

"Tutto andrà bene" (Döt jará bun): Ince les mitans y i mituns á mené segnai de speranza tratan l'emergënza coronavirus.(Foto: USP)

Indoman, mertesc ai 16 de jügn él ofizialmënter la fin dl ann de scolina y de scora 2019/20 por les scolines, scores elementares y mesanes. Bele en vëndres él gnü stlüt jö l’ann scolastich por les scores altes y profescionales. Al se röia insciö n ann de scora dër particolar porvia dla stlüta de dötes les scolines y scores tl mëis de merz por archité la defujiun dl coronavirus.

L’assessur por la scora ladina Daniel Alfreider dij: “Chësc ann de scora é sté na gran desfida por dötes y düc. Scolares, scolars, geniturs y maestres y maestri á fat le miú aldinfora de na situaziun daldöt nia saurida. Al s’á desmostré che l’investimënt tla digitalisaziun bele ti agn passá é sté fondamental por chisc mëisc. Impó él ince te chësc setur ciamó da investí inant. I laorun bele sëgn por arjigné ca le scomenciamënt dl ann de scora 2020/21”.

L’intendënta dles scolines y scores ladines Edith Ploner sotlignëia por la fin dl ann de scora: “L’ann de scora 2019/20 jará ite te na manira particolara tl curriculum de formaziun dles mitans, di mituns, dles scolares y di scolars de düc i liví. I un odü tan important che le coliamënt danter les families y les scores è, dantadöt por la formaziun scolastica. Dötes y düc chi che laora tl monn dla formaziun é stá obliá da mët en pratica mosöres por ti jí adincuntra a chëstes situaziuns de emergënza, mo cun la poscibilité da podëi ince imparé val por le dagní.”  

Scolines y scores ladines: 3.151 iscriziuns

Indöt á frecuenté 3151 mitans, mituns, scolares y scolars na scolina y scora ladina. 761 mitans y mituns é jüs te öna dles 17 scolines dles valades ladines, 1112 scolares y scolars á frecuenté na scora elementara ladina y 756 a na scora mesana ladina. Tl ann de scora 2019/20 él sté 487 scolares y scolars che á frecuenté na scora alta ladina y 35 la scora profescionala Cademia.

Indöt él 100 scolares y scolars che s’arjigna ca ai Ejams de Stat do la cuinta classa dla scora alta y 1 n scolar che á fat la scora profescionala Cademia a Urtijëi. Indöt él inann 272 scolares y scolars che á frecuenté la terza classa de na scora mesana ladina.

Zifres dles scores todësces y talianes

Tles scores elementares, mesanes y altes todësces él l’ann scolastich che se röia indoman por 45.616 scolars y scolares. Tles scores profescionales él indöt 7429 che röia l’ann scolastich. 12.402 mitans y mituns é jüs a scolina todëscia tratan l’ann de scolina 2019/20. 22.500 scolars y scolares é jüs a na scolina o na scora taliana de düc i liví.

Rengrazimënc por l'ann particolar rové a piz 

"Les insegnantes y i insegnanc - sotlignëia l'assessur por la scora todëscia Philipp Achammer - á messü s'adaté te n tëmp dër cört al insegnamënt da ciasa. Mo por merit dl impëgn sunse stá bugn da garantí le dërt dla formaziun. Ince la colaboraziun danter l'istituziun scora y les families á funzioné dër bun." 

Sides l’assessur por la scora taliana Giuliano Vettorato co le suranstant dla Direziun dles scores talianes Vincenzo Gullotta sotlignëia che “l’ann passé al é sté n’esperiënza cun na seria de dificoltés mo che pó ince ester n insegnamënt. Les scolares y i scolars á imparé da mët en pratica cosses imparades tla teoria adoran stromënc digitai. Ince les insegnantes y i insegnanc á desmostré da ester n punt de referimënt important por sü scolars y scolares.”

Düc i trëi assessurs Alfreider, Achammer y Vettorato ti fej les mius aodanzes ai scolars y scolares por i ejams che i aspeta y rengrazia dötes les porsones che á daidé para por porté a piz chësc ann de scora y che laora bele por le proscim ann 2020/21.

USP/ASP

Galaria dales fotografies