Atualità

Cripele ladina tl Quirinale: Mattarella y Alfreider ala daurida

Le vizepresidënt dla Provinzia Daniel Alfreider á incunté tratan la daurida dla mostra dla cripele tl Palaz dl Quirinale le Presidënt dla Republica taliana, Sergio Mattarella.

Le Presidënt dla Republica, Sergio Mattarella adöm al vizepresidënt dla Provinzia Daniel Alfreider tratan la daurida dla mostra tl Palaz dl Quirinal (Foto: Palazzo del Quirinale)

La mostra dal titul “Nativité. L’ert dles cripeles te Gherdëna” di artisć Filip Moroder Doss y Thomas Comploi é gnüda daurida incö, mercui ai 11 de dezëmber, en presënza dl Presidënt dla Republica, Sergio Mattarella y dl assessur por la scora y cultura ladina, Daniel Alfreider tl Palaz dl “Quirinale” a Roma. Le Presidënt dla Republica á fat i complimënc por l'opera artistica.

Por l’assessur Alfreider él sté n gran onur podëi rapresenté la Provinzia de Balsan ala daurida y podëi se congratulé cun i zipladus de Gherdëna, Filip Moroder Doss y Thomas Comploi, por l’opera artistica dër garatada. “Al é na gran ligrëza che l’ert dl ziplé de Gherdëna, che vëgn tramandada da secui, vëgn presentada tl Quirinale a Roma. La cultura ladina á insciö ciafé na paladina de gran prestisc por podëi se presenté”, á dit Alfreider. Chësc é n ater vare important por amplié la conescënza dl artejanat artistich de Gherdëna ince aldinfora dla Provinzia, insciö Alfreider. “Sciöche ladins y südtirolesc podun ester capazi de nüsc artisć”, insciö Alfreider.

Ala daurida é ince stá presënc i ombolc Tobia Moroder (Urtijëi), Moritz Demetz (Santa Crestina) y Stefan Leiter (Laiun).

Da odëi él na cripele de lëgn realisada da Filip Moroder Doss y Thomas Comploi, tramidui ince cumëmbri dl’UNIKA. L’opera é gnüda ziplada a man, ara é de lëgn de linda, alta dui metri y caranta y leria diesc metri. L’opera é stilisada y ara inviëia i vijitadus da ponsé do. Le grup dla Sacra Familia é tl zënter: le Bambin Gejú é indoré, Maria y Ujöp vëgn rapresentá te n corp su. An pó zënzater ince interpreté l’opera dla Sacra Familia cun na tle moderna y trasporté la situaziun tl tëmp da aldedaincö. Al é n resultat de n laur scialdi impegnatif y che dará tröpes emoziuns ai vijitadus.

L’opera di zipladus de Gherdëna é gnüda chirida fora por süa rapresentaziun moderna, portan insciö l’ert de Gherdëna te n contest nazional.

La mostra sará daverta dai 13 de dezëmber ai 5 de otober. Por deplü informaziuns preibël vijité: https://palazzo.quirinale.it/mostre/2019_presepe/presepe2019_home.html

USP/USP

Galaria dales fotografies