Atualità

Evaluaziun dla scoles y dla scolines ladines: ressumé prejentà

La respunsabla dl Servisc provinziel per l’evaluazion dla scoles y dla scolines ladines à prejentà dan da puech l ressumé dl’ativiteies fates y nviedes via.

Evaluaziun dla scoles y dla scolines ladines: ressumé prejentà (FOTO: USP/Roman Clara)

Aldò dl decret dl Sëurastant dla provinzia n. 39 dl 5 de nuvëmber 2012 y acioche l lëur sibe ubietif y trasparënt, coche l ie scrit dant, à la respunsabla dl Servisc Rosmarie Mussner prejentà l lëur fat y nvià via ntan l ann de scola 2018/2019.

Ntan l’ancunteda di 20 de setëmber 2019 cun l assessëur ala scola y cultura ladina Daniel Alfreider y cun la diretëura y intendënta dla scoles y scolines ladines Edith Ploner iel unì purtà dant l cuntenut dla relazion cumplessiva. Te n segondo mumënt, deberieda cun i autri Servijes provinziei per l’evaluazion da dedora dla scoles tudësces y talianes, uniral prejentà n ressumé ai cumëmbri dl Cunsëi Scolastich Provinziel.

La relazion cumplessiva juda a fé na reflescion plu sota sun l svilup scolastich. La sustën la cumenanza de scola ti mustran su la cualiteies unides a lum y analisan la dumbrìes y la loces da curì. Ntan l’ancunteda à la respunsabla dl Servisc provinziel per l’evaluazion dla scoles de Gherdëina y dla Val Badia auzà ora na bela cumpëida de ponc stersc unii a lum tres l’evaluazion da dedora dla scoles, che juda zënzauter a valorisé la cualiteies bele prejëntes te uni scola y che porta pro a prijé for plu y plu l sistem paritetich ladin.

La majera cualità ie zënzauter chëla de n plurilinguism sterch che ti gëura la portes a n grum de sculeies y de sculées che va inant a studië, ma ënghe a chëi y a chëles che va tl mond dl lëur y possa se nuzé de na bona preparazion y de cumpetënzes te de plu lingac.

La scoles ladines à for fat pea pra la proes INVALSI y pra l stude PISA desmustran nsci n livel de marueia dantaldut per cie che reverda l nglëisc y i conc.

La majera pert di sculeies y dla sculées se fej saurì a fé na scola auta tudëscia o taliana y dopro nce a se crì ora la drëta università sibe tla Talia che oradecà. Chësta ie na cunfërma che tla scoles ladines vëniel laurà a fin de bën per njinië ca i mutons y la mutans a si daunì.

L Servisc provinziel per l’evaluazion à nce nvià via na bona culaburazion cun i autri servijes per l’evaluazion dla scoles tudësces y talianes te Südtirol y cun la valedes ladines ujines per nes giamië ora minonghes y per fé deberieda proiec y mëter a jì scumenciadives tl ciamp dl’evaluazion, che juda a nes arichì tl ciamp culturel y linguistich. Ma l’evaluazion ne fina nia via cun la relazion cumplessiva, la ie n pruzes de cualità y de reflescion che va for inant y che tën cont de duc i ciamps de istruzion, educazion y furmazion prejënc tla scoles y tla scolines.

Cheder normatif

L’evaluazion da dedora se à tenì y se tën inant al decret n. 80 dl Presidënt dla Republica dl 28 de merz 2013, al cheder de referimënt per la cualità dla scoles de Südtirol y ai standards de cualità, aldò dla delibra n. 1599 dl Guviern provinziel dl 23 de dezëmber 2014.  Nia da desmincë ie la lege n. 107 sun „La Buona Scuola“ dl 13 de lugio 2015, che scrij dant l plann trienal dla ufierta furmativa cun l cunzet de cualità per uni scola y la descrizion dla intlujion tl cheder de urientamënt.   Cun l decret n. 62 dl 13 de auril 2017 ie la proes INVALSI de ublianza y la delibra dl Guviern provinziel n. 117 dl 6 de fauré 2018 à cunfermà la partezipazion a chësta proes nce da pert dla scoles ladines. L decret dla provinzia Autonoma de Bulsan n. 689 dl 2018 à regulamentà la cunvenzion danter la trëi Intendënzes y l INVALSI per la partezipazion ala proes PISA 2018 y de dezëmber dl 2019 uniral prejentà i resultac. 

USP

Galaria dales fotografies