Atualità

Zënter scolastich da La Ila: 10 miliuns por la reorganisaziun

La Junta provinziala á da püch inserí tl program trienal dles operes publiches indöt 10 miliuns por la reorganisaziun dl Zënter scolastich da la Ila.

Vare inant por le Zënter scolastich da La Ila (d.m.c.): l'assessur por le frabiché Massimo Bessone, l'ombolt Iaco Frenademetz y l'assessur por la scora ladina Daniel Alfreider (Foto: USP/Roman Clara)

N vare important por la reorganisaziun dl Zënter scolastich a La Ila. La Junta provinziala á aprové te süa sentada di 3 de setëmber le program trienal 2019/2021, olache al vëgn cumpedé sö les operes en costruziun, en apalt o chëres che gnará scrites fora cina la fin dl 2021. Dl program fej ince pert le finanziamënt de 10 miliuns dla Provinzia por la reorganisaziun dl Zënter scolastich da La Ila, che tol ite l’ampliamënt dles scores altes y dla scora mesana, la creaziun dla scora de musiga y de sperses coletives. Al é ince preodü le ressanamënt egergetich de n valgönes perts dla scora alta.

“I sun dër contënt dla programaziun che é gnüda fata da nüsc tecnics y dla colaboraziun che i un cun le Comun de Badia por la realisaziun de chëstes operes scolastiches, che è d’interes provinzial y comunal”, dij l’assessur por le patrimone y le frabiché publich Massimo Bessone, che á ince sotrissé che “les ressurses implü che é gnüdes assegnades cun l’assestamënt dl bilanz y che é stades damanades ince dal assessorat al frabiché a bëgn dla comunité ladina é n sëgn de crëta y de reconoscimënt por nosc laur.”

L’assessur por la scora y cultura ladina Daniel Alfreider á sotrissé “l’importanza strategica dles operes scolastiches tles valades ladines, che ne garantësc nia ma posć de laur y strotöres modernes sön le post, mo che é la fondamënta sön chëra che nüsc jogn y nüsc studënc pó crësc y se svilupé.” Ares é ince n valur implü por la cualité de vita dla comunité dla Val Badia y n aiüt important por les families che á na strotöra scolastica sciöche al alda nia dalunc da ciasa, é a öna Bessone y Alfreider.

“N investimënt strategich é ince la costruziun dla scora de musiga, deache tla Val Badia unse pö na gran tradiziun musicala, cun tröpes musighes y grups musicai. Al é porchël fondamental da svilupé adöm cun ëi strotöres modernes y adatades a sü debojëgns locai”, á dit Alfreider.

Contënt é ince l’ombolt de Badia, Iaco Frenademetz, che á recordé che la segurëza economica é dër importanta por la proietaziun dl dagní. “Cun chësc vare podunse sëgn mëte man la fasa de proietaziun y sciöche Comun metarunse ince nos sëgn te bilanz la soma de cofinanziamënt”, dij l’ombolt.

L’investimënt é por le momënt de döt adöm 15,8 miliuns d’euro. La Provinzia finanziëia le proiet cun 10 miliuns. La Provinzia y le Comun de Badia é drio a lauré fora na convenziun por definí les competënzes tles fases de proietaziun y de costruziun. Al momënt él tl Zënter scolastich la scora mesana “Tita Alton”, la scora alta (Istitut Tecnich Economich y Lizeum Linguistich) y la scora de musiga dla Val Badia.

 

USP

Galaria dales fotografies