Atualità
Scora ladina: plata internet da na iesta nöia
Cun na strotöra plü tlera, é sëgn les plates internet dla scora ladina plü saurides da anuzé por i zitadins
Dan da püc dis é gnüda metüda online la plata internet nöia dla scora ladina. "Les scolares y i scolars, i geniturs, i insegnanc y düc i atri interesciá sciafiará da rové debota pro les informaziuns che ai adora", dij l’Assessur por la Scora ladina Daniel Alfreider. Les families ará la poscibilité da chirí sö alasvelta, ince da ciasa demez, dötes les informaziuns che reverda le monn dla scora ladina y sües particolaritês, insciö Alfreider.
Al é da ciafé informaziuns sura les scores elementares, mesanes y altes dles valades ladines, sura l’aministraziun dla scora, sura les particolaritês dl sistem de formaziun ladin y tröp deplü. Les plates nöies á na strotöra tlera, ares é saurides da anuzé y sü motors de chirida dá la poscibilité da ciafé sö alasvelta les informaziuns. Döt chësc pon fá adoran le computer, le smartphone o le tablet.
I portai nüs á sostituí les plates internet dl’Intendënza y Cultura ladina da denant. Ares é gnüdes realisades dal’Intendënza y Cultura ladina en colaboraziun cun la redaziun zentrala dl’agenzia de stampa dla Provinzia, cun la Repartiziun Informatica y la SIAG (Aziënda Informatica Südtirol)
La plata internet nöia é da ciafé sot a http://www.provinz.bz.it/formaziun-lingac/scora-ladina/la/default.asp.
USP
