Atualità

Intendënt nü/Intendënta nöia: Consëi scolastich nominëia la terna

Edith Ploner, David Lardschneider y Lara Moroder é i inoms che la seziun ladina dl Consëi scolastich provinzial á nominé por l’inciaria da intendënt/intendënta.

Incö, jöbia ai 26 d’aurí él gnü stabilí tla sentada dla seziun ladina dl Consëi scolastich provinzial tla sënta dl Departimënt Educaziun y Cultura ladina la terna de trëi candidac y candidates por la nominaziun dl Intendënt nü/dla Intendënta nöia dles scolines y scores dles localités ladines. Do l’ejaminaziun di recuisic él gnü a se le dé incö ofizialmënter l’aldiziun de düc i candidac y dles candidates. Do na presentaziun avisa di Curriculum Vitae á i candidac podü presenté sües vijiuns pedagogiches y de svilup dl sistem educatif ladin.

Düc i mëmbri dla Seziun ladina presënc (11 sön 13, 1 ê instësc candidata, l’ater n'á nia podü lité pora rajiun de parentela) á albü spo la poscibilité da lité cina dui candidac. Sön la basa dl resultat lital él gnü fat la terna di candidac y dles candidates da proponé ala Junta provinziala. Le resultat dla litaziun socrëta é: Edith Ploner (9 usc), David Lardschneider (3 usc) y Lara Moroder (2 usc).

La Junta provinziala chiriará sëgn fora danter chëstes la porsona por curí chësta inciaria, do avëi aldí le Minister dla Istruziun a Roma.

L’iter che porta ala nomina dl’intendënt/dla intendënta nöia por les scores dles localités ladines é regolamenté dal art. 19 dl Statut de autonomia cun integraziuns tl D.P.R 89/83 y vëiga danfora na nomina fora de na terna proponüda dala seziun ladina dl Consëi scolastich provinzial. Tla sentada di 12 de merz dl 2018 â la seziun ladina dl Consëi scolastich provinzial scomencé la prozedöra por chësta nomina.

Cina ai 6 d’aurí êl sté poscibl da fá domanda de candidatöra ala inciaria. I candidac y les candidates che á tut pert al'aldiziun é stá l’insegnanta Monica Insam, l’insegnant David Lardschneider, l’insegnanta Lara Moroder, l’ispeturia dles scolines ladines Edith Ploner y la colaboradëssa dl Departimënt Scora y Cultura ladina Susy Rottonara.

 

USP