Atualità

Ejams de Stat tla scora alta: Les materies dla secunda proa scrita

Le Departimënt Educaziun y Cultura Ladina á publiché incö les materies di Ejams de Stat dles scores altes ladines che reverda la secunda proa scrita.

Le MIUR (Ministero Istruzione Università e Ricerca) á publiché ai 31.01.2018 les materies dla secunda proa scrita dl Ejam de Stat 2017-18 y les materies che ti vëgn assegnades ai comissars esterns dla comisciun. Por la Provinzia da Balsan vëgn les materies dessura definides, aladô dl Statut de Autonomia, dal MIUR sön proposta dles 3 Intendënzes. Insciö él gnü publiché da pert dl Intendënt dr. Roland Verra incö, ai 1 de forá 2018, les materies che reverda les scores altes ladines por l’ann de scora 2017-18.

Por les trëi direziuns dla Scora d’Ert Cademia él gnü chirí fora la materia „Pitöra“ (seziun de Ert figurativa), la materia „Grafica“ (seziun de Grafica) y la materia „Proietaziun y design“ (seziun de Design). Por ci che reverda la Scora Profescionala (seziun de “Produziuns de industria y artejanat) sará la materia d’ejam dla secunda proa „Tecnologia di prozesc produtifs“, tl Lizeum linguistich gnarál ejaminé la materia „Inglesc“ y tl Lizeum del Sciënzes Umanes la materia “Sciënzes umanes”; pro l’ITE (sides La Ila co Urtijëi) sará les materies dla secunda proa „Economia aziendala“ (seziun Aministraziun, Finanzes y Marketing) y „Inglesc“ (seziun Turism). La tabela cun dötes les proes scrites é gnüda injuntada, te chëra che al é ince da ciafé les materies che gnará ejaminades da comissars esterns.

I ejams de Stat dles scores altes mët man ai 20 de jügn 2018 cun la pröma proa scrita. Dötadöm él scrit ite atualmënter 102 studëntes y studënc tla cuinta classa dles scores altes y profescionales tles valades ladines, de chisc n’él 38 scric ite tl Lizeum d’Ert, 38 tl I.T.E. da Urtijëi y 14 tl ITE da La Ila, 5 studëntes/studënc fej atualmënter la cuinta classa dl Lizeum Linguistich y 4 dl Lizeum de Sciënzes Umanes a La Ila, 3 la Scora Profescionala de Artejanat Artistich a Urtijëi.

Pro la pröma proa scrita podará i candidac dles scores ladines chirí fora sce ai ó scrí le tema por talian o por todësch. La secunda proa scrita reverda na materia caraterisënta de chëra scora y á le fin da valuté les conoscënzes spezifiches dl studënt y dla studënta. La terza proa scrita é partida sö te döes pertes y te dui dis. Le pröm de vëgnel scrit n tema te chël lingaz che ne é nia gnü adoré pro la pröma proa scrita. Le secundo dé respogn les candidates/i candidac a na ligna de domandes che reverda 4 o 5 materies. L’ejam de stat se stlüj jö cun la proa a usc che tól ite dötes les materies de chël ann de scora.

 

USP