Atualità

Reconoscimënt por i 134 maturanc cun la valutaziun plü alta

Na picera festa é gnüda organisada incö 28 de dezëmber a Balsan por i maturanc jogn adöm al presidënt Kompatscher y i assessurs por la scora.

I maturanc plü lezitënc dl 2017 adöm al presidënt Kompatscher y ai assessurs provinziai Tommasini, Mussner y Achammmer. Foto: USP/Othmar Seehauser

Ai é gnü premiá incö danmisdé tl Palaz Widmann dal presidënt dla Provinzia, Arno Kompatscher, y dai assessurs por la scora Christian Tommasini, Florian Mussner y Philipp Achammer, i 134 studënc y studëntes che á arjunt dal’ejam de maduranza i 100 punc y i 100 punc cun lalda.

Te so intervënt á le presidënt Kompatscher fat sües congratulaziuns ai jogn y ales jones premiades por chësc travert important arjunt. “Romagnede daverc y interessá al monn y ciarede da adoré ostes competënzes por ves svilupé inant. La formaziun é la tlé dl suzes sides tla vita co ince tl monn dl laur.” Le presidënt ti á spo aodé ai studënc da descurí les poscibilités che vëgn pitades t’Europa y sura döt le monn recordan che “por le Südtirol él fondamental che i gnëis indo zoruch, deache i ún debojëgn de ostes competënzes y capazités. Bele aldedainco él mancianza de personal cualifiché y chësc sará ciamó plü da sintí tl dagní.”

Ince l’assessur por la scora ladina Florian Mussner á rengrazié i jogn maturanc cun la valutaziun plü alta y ti á fat i complimënc por chësc resultat d’ezelënta. L’assessur ladin á recordé che “i maturanc premiá ne á nia ma desmostré da avëi cualités ezelëntes te scora, mo ince aldinfora, sciöche por ejëmpl ti ciamps dl sport, dl sozial, dla cultura y dl volontariat”. Por ci che reverda i candidac dales valades ladines á arjunt i  100 punc á  Irene Lardschneider da Sëlva (Istitut Tecnich Economich Raetia – seziun sport), Daniela Runggaldier da Santa Crestina (Istitut Tecnich Economich Raetia) y Alex Designori da Sëlva (Lizeum "Jakob Philipp Fallmerayer" da Porsenú).

I assessurs Tommasini y Achammer á sotligné por l’ocajiun che chësc resultat ezelënt ne é nia ma n’arjunta personala, mo ince n resultat important por döta la sozieté südtiroleja. Ala zerimonia en onur di studënc tl Palaz Widmann a Balsan ál ince tut pert l’intendënt dla scora ladina Roland Verra y dla intendënta por la scora taliana Nicoletta Minnei.

Al é gnü injunté le documënt cun düc i premiá.

Documënc video y audio

Imajes video dla manifestaziun


Intervista Arno Kompatscher

Intervista Florian Mussner

Intervista Philipp Achammer

Intervista Christian Tommasini

Intervistes studënc y studëntes

 

 

USP

Galaria dales fotografies