Atualità

„Porta daverta“ tles scores altes: Informaziuns por geniturs y scolars

La brosciüra nöia sön l'oferta dles scores altes, profescionales y i istituc tecnics tl Südtirol é danman cun tröpes informaziuns por scolars y geniturs.

La brosciüra cun i dis dla porta daverta y les scomenciadies de presentaziun dles scores altes y profescionales por l'ann de scora 2018/19 dl Südtirol é danman.

Por daidé i scolars y les scolares dla scora mesana da to la dezijiun sön ci scora alta chirí fora él les scores altes, profescionales y i istituc tecnics che mët da jí plü dis dla "porta daverta" y manifestaziuns d’informaziun. La brosciüra d'informaziun cun dötes les dates é da püch desponibles tres la plata internet dl Ofize orientamënt scolastich.

Cun la contlujiun dl percurs formatif dla scora mesana röia milesc de scolars y scolares, adöm a sü geniturs, tla situaziun da mëssei chirí fora cina ai 15 de merz dl 2018  na scora alta o profescionala adatada o n Istitut tecnich adaté por so dagní. Ti proscimi mëisc – valgönes scores y istituc á bele metü man – gnarál organisé de plü manifestaziuns d’informaziun y „dis dla porta daverta“ olache les scores ti pitará la poscibilité ai scolars y ales scolares da se fá n’idea dles poscibilités de formaziun do la scora mesana tl Südtirol. Les manifestaziuns d'informaziun é na buna ocajiun por düc i scolars y les scolares y por sü geniturs da imparé da conësce diretamënter i istituc y l’oferta didatica pitada. Informaziuns plü monüdes sön les manifestaziuns y sön i dis dla "porta daverta" dles scores altes, profescionales y i istituc tecnics pon ciafè tres l’Ofize orientamënt scolastich (tel. 0471 413350). Les brosciüres cun dötes les informaziuns ajornades po gnì desciariades tres la misciun www.provinz.bz.it/bildungsfoerderung/service/978.asp

Por ci che reverda les scores altes y profescionales talianes vëgnel metü da jí la scomenciadia "Orientando" che gnará a se le dé ai 29 y 30 de novëmber a Balsan.

Por ci che reverda les scores altes tles valades ladines é chëstes les dates di dis dla porta daverta:

  • Scora d’Ert „Cademia“ y scora profescionala por l’artejanat artistich: De dla porta daverta ai 25 de novëmber dl 2017 dales 08.30 ales 14.30 (prenotaziuns al 0471 796240 o email se.urtijei@schule.suedtirol.it)
  • Scora alta Istitut Tecnich Economich „ITE – WFO – Sport Raetia“: Dis de proiet dai 22 ai 24 de jená dl 2018 y De dla porta daverta al 1. de forá dl 2018 dales 07.45 ales 12.50 y dales 14.35 ales 17.05 (ma do prenotaziun: tel. 0471/796296 o e-mail: ite.urtijëi@schule.suedtirol.it)
  • Scora alta Istitut Tecnich Economich, le lizeum dles sciënzes umanes y le lizeum linguistich da La Ila: „De dla porta daverta“ ai 30 de novëmber dl 2017 dales 08.30 ales 16.00 (prenotaziuns al 0471 847252 o email itc.la-ila@schule.suedtirol.it)

Informaziuns plü monüdes pon ciafè chilò: www.provinz.bz.it/bildungsfoerderung/service/978.asp

 

USP

Galaria dales fotografies