Atualità

Zënter pedagogich a Picolin garantësc posć de laur söl post

Le Zënter pedagogich nü de Picolin é gnü inaudé ai 9 d otober a San Martin. I obietifs: vijinanza di sorvisc publics y garantí posć de laur tles valades.

Tratan la daurida dl Zënter pedagogich nü a Picolin (d.m.c.): l’assessur Florian Mussner, le ploan Iaco Ploner, l’ispeturia Edith Ploner, l’intendënt Roland Verra y le diretur Felix Ploner (Foto: USP/ANgelika SChrott)

Ester plü daimpró ai zitadins, pité sorvisc y consulënza diretamënter söl post y garantí posć de laur tles valades ladines: chisc é i fins dla realisaziun dl Zënter Pedagogich nü a Picolin tl Comun de San Marin de Tor. La strotöra, te chëra che al á lerch de plü sorvisc, é gnüda inaugurada incö ai 9 d'otober en presënza dl assessur por la scora ladina Florian Mussner y ai suranstanc dl Departimënt Educaziun y Cultura ladina Roland Verra, Felix Ploner y Edith Ploner. La benedisciun di ofizi nüs y de döta la strotöra é gnüda fata dal ploan Iaco Ploner. „Porté i posć de laur dales cités tles localités da munt fora por la Provinzia é un di obietifs fondamentals dla Junta provinziala da tröc agn y cun la realisaziun dl Zënter pedagogich a Picolin, olache al laora söporjö 20 colaboradus de sorvisc desvalis, vëgnel garantí una soluziun por la Scora ladina“, spliga l'assessur Florian Mussner. Chësta daurida ne é insciö nia ma na sauridanza por düc i colaboradus dla Val Badia, mo ince n aiüt a düc i zitadins de Gherdëna y dla Val Badia, che ciafa consulënza y informaziuns diretamënter söl post, insciö Mussner.

Ince l'intendënt Roland Verra á recordé l'importanza dl zënter pedagogich nü, "dantadöt deache por n grup linguistich sciöche chël ladin él fondamental da avëi posć de laur tles valades ladines che garantësc ince le mantignimënt y le svilup de döta la mendranza", insciö Verra. Öna dles promoturies dla creaziun dl Zënter nü, l'ispeturia Edith Ploner, á recordé la storia dla strotöra dal 1957 inant y le gran laur doia de plü dezenns por porté a fin la daurida dl'istituziun nöia, "che é n arichimënt por trames döes les valades ladiens y le Departimënt Educaziun y Cultura ladina". Tla strotöra ciafa lerch de plü sorvisc: la Direziun dles scolines, l’Orientamënt scolastich y profescional, de plü ofizi de Inovaziun y Consulënza, l’Ispetorat dles scores ladines, l’Ispetur de religiun, le Sorvisc ai Jogn, la Ciamena dal guant sciöche ince le sorvisc Blanch y Fosch.

Tröc sorvisc söl post y sot a un n tët

La sistemaziun de düc chisc sorvisc sot un n tët é stada poscibla tres la metüda a desposiziun dl frabicat relativamënter gran dla ex Ciasa de Palsa a Picolin da pert dla Provinzia tres n contrat de afit.

Sciöche le diretur dla repartiziun scora y cultura ladina dla Provinzia Felix Ploner dij „impormët le Zënter Pedagogich da sfruté te na manira efiziënta forzes y sinergies danter i sorvisc desvalis y ince da ti alisiré plü saurí le contat a chi che le chir.“ Ploner sotrissëia inant che „ le Zënter Pedagogich rapresentëia na arjunta strotorala importanta y n gran davagn a bëgn dla popolaziun. La metüda a desposiziun de posć de laur tla valada é n vare tla dërta direziun y ti dá ince la poscibilité a de plü ofizi desvalis da lauré adöm y da fá comunanza.“ Le Zënter Pedagogich Picolin é nasciü sön iniziativa dla ispeturia dles scolines Edith Ploner y porté inant adöm a Inovaziun y Consulënza sön inciaria dl assessur Florian Mussner.

Planificaziun de renforzé les localités de döta la Provinzia

N'atra proposta por studié damí la situaziun dl trafich te döt le Südtirol é l'istituziun de n Ofize provinzial che analisëia i movimënc dla mobilité y dla costruziun dles strades por garantí na viabilité otimala sön döt le raiun provinzial. "Y chiló fossl ince poscibl da planifiché por ejëmpl n ofize a Bornech che colaborëia cun i ofizi zentrai da Balsan y che cheriess spo posć de laur locai", spliga l'assessur Mussner che á porté inant l'idea che vëgn sëgn studiada a funz.

USP

Galaria dales fotografies