Atualità

Aprovades les diretives por la promoziun dles ativités educatives

La Junta provinziala á aprové les diretives por la promoziun dles ativités cun n fin educatif por i grups linguistics ladin y todësch.

Te süa sentada da incö (ai 31 de jená) á la Junta provinziala aprové la proposta di assessurs por la cultura Philipp Achammer y Florian Mussner por ci che reverda les „diretives por la promoziun dles ativités cun n fin educatif tres les Repartiziuns Cultura ladina y Cultura todëscia, l’Intendënza ladina y la Promoziun formativa“. „Por merit de chësta promoziun de ativités y de scomenciadies educatives podarál ince gní sostigní tles valades ladines manifestaziuns culturales“, dij l’assessur por la cultura ladina Florian Mussner.

„Al se trata chiló de diretives che á süa basa tla lege sön la cultura provinziala dl ann 2015“, spliga l’assessur Achammer. Bele damperfora él gnü aprové les diretives por ci che reverda la promoziun dl’ativité culturala y di investimënc, por la promoziun dles publicaziuns y por l’ativité d’editoria sciöche ince la promoziun cinematografica. „Al vëgn sostigní sides ativités anuales co ince proiec, al pó fá domanda dötes les organisaziuns zënza fins de davagn, che é atives da almanco dui agn tl Südtirol“, insciö Achammer.

Les sorts de promoziun é trëi: contribuc ordinars por l’esecuziun dl program d’ativités anual, contribuc por l’esecuziun de proiec cun n tëmp limité y contribuc ajuntifs por proiec. Al vëgn ince sostgní convëgns scientifics cun n fin formatif che trata damperfora tematiches locales dla Provinzia, ativités y manifestaziuns cun n fin educatif, cursc y iadi de stüde sciöche ince la cumpra de material didatich y de material de consulëza.

Fá domanda pó istituziuns, fondaziuns, consorc, assoaziaziuns y comités cun n aprovaziun de alplü l’80 porcënt di cosć aprová. Tl 2016 él gnü finanzié indöt 23 proiec cun n investimënt complessif de 342.665 euro.

usp