Atualità

Bonus cultura: Chi che complësc inann 18 agn, ciafa 500 euro

Por amplié l’interes cultural dla jonëza á le govern aprové na mosöra che ti garantësc ai jogn che complësc i 18 agn tl 2016 n „bonus cultura“ de 500 euro.

Düc i zitadins y les zitadines talianes che complësc i 18 agn tl 2016 pó s’anuzé dl „Bonus cultura“ por 500 euro da adoré por chertes por jí a teater, al cinema, por conzerc y d’atres scomenciadies culturales, por l’azes a museums, posć archeologics, galaries d’ert y istituziuns scientifiches, parcs naturai y por la cumpra de libri. Chësta proposta dess renforzé le lian danter i jogn y la cultura.

Por podëi s’anuzé dl bon él nezesciar da se registré naota tl Sistem Publich de Identité Digitala SPID cun n inom de anuzadú y na password che consët al Stat da reconësce online i zitadins. Fá domanda de azes al SPID pó düc i zitadins che á complí i 18 agn, che á na misciun email, n numer de fonin, n documënt d’identité varënt y la cherta sanitara cun le codesc fiscal. La domanda pó gní compilada sön les plates internet http://spid.gov.it/richiedi-spid, http://www.18app.it y http://www.diciottapp.it.

Do avëi fat la sotescriziun él spo poscibl fá domanda por le bonus cultura sön la plata internet http://www.18app.it. Le bonus pó spo gní adoré tres na app da desciarié, o ince cun voucher cun le „qr code“ o le „bar code“ pro les botëghes y istituziuns che fej para pro la scomenciadia. Te n’area aposta podará spo i studënc s’informé sön les ativités pitades y les strotöres convezionades.

Düc chi che á le dërt da fá domanda á tëmp cina ai 31 de jená dl 2017 da se registré sön la plata internet spezifica y cina ai 31 de dezëmber dl 2017 adoré sö le bonus cultura de 500 euro.

rc