Atualità
Inaudada la Fiera dla Formaziun „Futurum“ 2016
I assessurs Tommasini y Achammer y l’intendënt Verra á inauguré incö la Fiera Futurum che sará daverta cina al 1 de otober.
„Ciafa tüa strada“: chësc é le moto dla sesta ediziun dla Fiera dla Formaziun Futurum 2016 che é gnüda inaugurada incö jöbia, ai 29 de setëmber tla sënta dla Fiera da Balsan y che pita na suraodüda sön les propostes formatives dl monn dles scores altes y profescionales, dla formaziun profescionala, dles Universités tl Südtirol y tles vijinanzes sciöche ince dles profesciuns plü praticades tl Südtirol.
Te sües parores de salüd á le vizepresidënt dla Provinzia Christian Tommasini, l’intendënt dles scores ladines Roland Verra, en rapresentanza dl assessur Florian Mussner, y l’assessur por les scores todësces Philipp Achammer sotligné l’importanza dla manifestaziun che á l’obietif da informé y alisiré la dezijiun di jogn che röia a piz de n percurs formatif y che dëida insciö da svilupé zitadins responsabls che é na richëza por döta la sozieté. La valüta dla fiera é ince gnüda sotlignada dal’assessuria por le laur, l’avalianza dles oportunités y le personal dla Regiun Lazio, Lucia Valente y dal diretur dla seziun formaziun dla Regiun Venet Massimo Marzano.
La „Futurum“ é ponsada dantadöt por i scolars y les scolares dla scora mesana y alta, mo ince dles scores profescionales por s’informé sön les poscibilités desvalies che le monn dl’educaziun pita aldedaincö. Da ciafé ala Fiera Futurum él informaziuns y stang di Departimënc scolastics ladin, talian y todësch, dles Repartiziuns culturales, dla Repartiziun Dërt al Stüde, Universités talians y da foradecá y d’atres istituziuns.
Tratan la Fiera ti gnarál dé n’atenziun particolara ala scomenciadia MINT (cun na manifesteziun speziala indoman ai 30 de setëmber) che á sciöche obietif la promoziun dles materies tecniches y scientifiches sciöche la matematica, l’informatica, les sciënzes naturales y la tecnica. Implü vëgnel ince organisé tl contest dla Futurum le campionat statal dles profesciuns „Worldskills Italy“ che é tl medemo momënt ince la cualificaziun ai campionac mondiai dles profesciuns a Abu Dhabi tl 2017 cun indöt 28 profesciuns ala pert. Chësta finestra söl monn dl laur reverda de plü seturs dal’artejanat, al’agricoltöra, le turism cina ala gastronomia. Le campionat „Worldskills Italy“ gnará tigní dai 29 de setëmber al 01 de otober tla sënta dla Fiera Futurm cun indöt 5000 partezipanc che se á bele scrit ite.
La Fiera Futurum vëgn organisada dala Ofize Promoziun dl Stüde, Université y Inrescida Scientifica adöm cun i Departimënc dla scora todëscia, taliana y ladina, dai Ofizi Formaziun permanënta dla Cultura todëscia y taliana, dala Repartiziun Laur, sciöche ince dal LVH-APA y dala Fiera Balsan. 244 sará les scores partezipantes, 24 les Universités y 18 i Ofizi y Partners dla scomenciadia.
Por plü informaziuns: www.futurum.it
rc
Galaria dales fotografies
