Atualità

Contribuc por publicaziuns y ativités editoriales: presentá i criters

La pert che reverda i criters nüs por la promoziun y les ativités editoriales por le grup linguistich ladin é gnüdes aproades da püch dala Junta provinziala.

L'assessur Philipp Achammer á presenté incö danter l'ater ince i criters nüs por la promoziun de publicaziuns y ativités editoriales. (Retrat: USP/Ingo Dejaco)

Do l’aprovaziun di criters nüs por la conzesciun di contribuc por ativités y investimënc culturai por le grup linguistich todësch da en mertesc á l’assessur por la cultura todëscia, Philipp Achammer, presenté incö, ai 11 d’agost, le mudaziuns plü importantes te na conferënza stampa. I criters por le grup linguistich ladin y talian gnará aprová tles proscimes edemes tres deliberaziuns spezifiches dala Junta provinziala.

Na pert bele arpovada, che reverda ince le grup linguistich ladin, é la promoziun dles publicaziuns y dl’ativité de editoria. "Chësta poscibilité nöia da sostigní diretamënter ciases edituries é stada na ghiranza bele da plü tëmp, deache ara nes dá insciö la poscibilité da amplié le numer dles publicaziuns nöies por ladin o che reverda la cultura ladina y implü da potenzié l'ativité de scriturs locai", spliga l'assessur por la cultura ladina Florian Mussner. Te chësc setur vëgn insciö sostignides l’elaboraziun, le realisaziun y la cumpra de publicaziuns (ince te forma digitala) y la planificaziun de scomenciadies che á sciöche fin la trascmisciun y le posizionamënt de publicaziuns che trata dl Südtirol ince al’ester. Implü él ince preodü la promoziun de concursc y de surandades de pesć por ci che reverda publicaziuns de interes provinzial.

Por le pröm iade pó ince les ciases edituries fá domanda por contribuc  pro la realisaziun de programs, proiec y traduziuns che á n coliamënt spezial cun le raiun südtirolej. Les ciases edituries mëss avëi na strotöra organisativa adatada y süa sënta te n Paisc dl’UE o tla Svizra, ester presëntes te n register publich, avëi n’esperiënza de almanco trëi agn tl’editoria y publiché te na manira costanta publicaziuns de cualité. Por organisaziuns zënza fins de davagn él gnü tut demez la clausola de residënza tl Südtirol, al basta podëi desmostré n’ativité de dorada lungia de almanco dui agn tl Südtirol, na strotöra organisativa adatada y an’ativité che respidlëia la misciun edituria. Por publicaziuns pó porsones singules damané inant do contribuc provinziai, cun contribuc a proiet y contribuc ajuntifs cina al 70 porcënt dles spëises ametüdes en linia cun les diretives europeiches. N'alisiraziun implü é l’alzada da 80 a 90 porcënt dl paiamënt antizipé sön la cuota dl contribut general aprové.

rc

Galaria dales fotografies