Atualità

Prejentazion di resultac dl’evaluazion dl material didatich

Prejentazion di resultac dl’evaluazion da dedora dl material didatich dat ora dal ciamp Inovazion y Consulënza

Prejentazion di resultac dl’evaluazion dl material didatich (Imaja: USP/Felix Ploner)

Ntan la senteda di 5 de agost 2016 à la respunsabla dl Servisc per l’evaluazion dla scoles y dla scolines ladines Rosa Maria Mussner prejentà al Ntendënt Roland Verra, al Diretëur de Ripartizion Alexander Prinoth, al Diretëur de Inovazion y Consulënza Felix Ploner, ala Ispetëura Edith Ploner, al Ispetëur Albert Videsott y si secretera Romy Canins y ai/ala diretëures prejënc/prejëntes, Elisabeth Baur, Claudia Canins, Hannelore Insam, Maria Kostner, Otto Moling, Elena Pellegrini, Anton Senoner y Bruno Senoner, n pitl ressumé di resultac dl’evaluazion nvieda via y stluta ju d’ansciuda dl 2016 per i nsenianc y la nseniantes dla scoles mesanes y elementeres de Gherdëina y dla Val Badia.

Analisé y mustré su la cualità dl material didatich dat ora dal ciamp Inovazion y Consulënza (ex- IPL), valorisé l lëur furmatif y educatif che ti vën pità te uni scola, sustenì l nseniamënt che vën fat tla scoles ladines y auzé ora i aspec de gran mpurtanza dl model paritetich ladin, lià a si particulariteies y a si cuntest scolastich plurilinguistich, che à debujën de material didatich per uni rujeneda nsenieda, ma tl medemo tëmp nce te de plu rujenedes y pudëi purté pro nsci a n svilup scolastich de cualità: chisc fova i ubietifs prinzipei dla nrescida nvieda via coche evaluazion esterna.

Uni nseniant dla scola elementera y dla scola mesana de Gherdëina y dla Val Badia à pudù pië do l formuler IQES online, che ti à dat la puscibltà, aldò de si minonga de tò pusizion sun 18 ndicadëures de cualità. Dopro à l Servisc per l’evaluazion laurà ora n ressumé cun i ponc stersc y chëi da miuré che ie ruvei ite tla relazion cumplessiva, che n ti à sëurandat al’autoriteies dla scola ladina.

Sce n ti dà na udleda plu sota ala respostes possen udëi n cheder cumplessif drët sterch che auza ora la cualità dl material didatich y di debujëns dla scoles che n à for tenì ite te duc chisc ani. Da sorissé iel ënghe l dejider da pert de n valgun nsenianc de avëi de plu material didatich per la scoles mesanes, te duta la materies y sun argumënc defrënc, che purtëssa pro a miuré sibe la cumpetënzes linguistiches, ma ënghe chëles sozieles.

Danter duta la scoles de Gherdëina y dla Val Badia vëniel fat da pert de na bela cumpëida de nsenianc y de nseniantes na gran lauda al ciamp Inovazion y Consulënza per dut l material che l ie unit dat ora y perià bel de jì inant nsci. De plu nsenianc y nseniantes à sorissà la mpurtanza de garantì la uniteies didatiches per ladin ënghe tl daunì, sambënzënza per la scoles elementeres, mesanes y autes. “Bel fossel a avëi a despusizion per duta la scoles de plu cudejiei per fé eserzizies, chësta frasa vën dant plu suvënz ti formuleres per Gherdëina y per la Val Badia. Scialdi nsenianc y nseniantes, dantaldut dla Val Badia, à auzà ora la mpurtanza de dé ora libri da liejer sibe tla scola elementera che mesana. Dantaldut te Gherdëina, ulache l ie bele dai ani migranc tla scoles, se mbincëssen de tei pitli cudejiei drët scëmpli per pudëi mparé ladin y de tei pitli libri da pudëi liejer da sëui.

Da auzé ora iel che mé sies nsenianc dla scoles mesanes à njuntà che dut l material didatich vën adurvà puech o nia y mé trëi che ëi ne l cunësc nia. I resultac de chësta evaluazion da dedora ie na cunfërma dl gran prugres che à fat pea te duc chisc ani l model paritetich ladin.

USP

Galaria dales fotografies