Atualità

Scora y scolines ladines: Assegná indöt 13 posć a tëmp indeterminé

En vëndres, ai 05/08, él gnü surandé dal’Intendënza ladina 9 posć de rode cun contrat a tëmp indeterminé tles scores ladines. 4 é i posć assegná tles scolines.

Dötadöm él sté poscibl da assegné 9 posć de rode a tëmp indeterminé por ci che reverda les scores elementares, mesanes y altes che vëgn manajades dal’Intendënza ladina da Balsan y 4 posć de rode a maestres de scolina. En vëndres ai 5 de agost él gn assegné insciö 8 posć de rode a tëmp indeterminé tles scores elementares y mesanes, de chisc é cinch fora dl organich de dërt y trëi fora dal organich provinzial suplementar. Implü él gnü assegné un n post de rode tles scores altes. „La continuité didatica é öna dles fondamëntes por le bun funzionamënt dl sistem scolastich ladin y chësc ti dá ince stabilité al percurs di maestri y dles maestres“, á dit l’assessur por la scora ladina Florian Mussner che valutëia positivamënter l’assegnaziun di posć. Ince por l’intendënt dles scores ladines Roland Verra él n „gran vantaje por la scora ladina da avëi podü stabilisé na pert dl personal insegnant, ci che ti dá na prospetiva de laur concreta a nüsc jogn y che ti dá plü valur ala formaziun cun vantaji dantadöt por i scolars.“

Cun l’assegnaziun de 12 posć l’ann passé, 14 tl 2014 y de 9 chësc ann él sté poscibl da assegné ti ultims trëi agn indöt 35 posć de rode. Implü ti él gnü surandé da pert dl’Intendënza ladina ales maestres y ai maestri 17 suplënzes anuales tles scores elementares y mesanes y 10 tles scores altes che fej fora indöt 27 suplënzes anuales surandades tles scores dles valades ladines.  I posć dles scolines é indere gnüs assegná bele de jügn. Dal ann de scolina 2016/17 inant sarál 4 maestres che ciafa n post de laur a tëmp indeterminé. Ai 19 de lugio él gnü firmé n contrat de transiziun che smendrësc l'orar de laur da 34 a 33 ores al'edema.

USP