Scora / Cultura | 05.02.2026 | 08:00

I jüc olimpics tles scores ladines

Le Ciamp pedagogich dla Intendënza y Cultura ladina á lauré fora material didatich nü – La unité didatica “Sport da d’invern” fej pert dla racoiüda “Laurun deboriada”

BALSAN (USP). Olympia a Antersëlva y Cortina: Le Ciamp pedagogich dla Direziun provinziala Scolines y Scores ladines á lauré fora por chësta ocajiun material didatich nü y inovatif tl lingaz ladin. Tres n sföi de laur vëgn les mitans y i mituns inviá da descurí le monn dl sport da d’invern y da ti jí do ales domandes: Co é pa pordërt piá ia i jüc olimpics? Por ci stá pa i cin’ aní? Da olá vëgn pa la flama olimpica? Ci disciplines él pa? Cai é pa atlec conesciüs de nosc raiun? Co se desfarenziëia pa i jüc da inlaota cun chi da incö? Ci é pa les paralimpiades? Chësta unité didatica ne vá nia ma a inrescí la storia dles olimpiades, mo trata ince argomënc plü generai di sporc da d’invern, sciöche le dër comportamënt, le respet y la segurëza söla nëi.

La unité "Sport da d’invern" fej pert de na morona de unités didatiches dal titul "Laurun deboriada", olache la pröma pert cun 16 sföisc é bele gnüda stampada. Defata podarán presenté la secunda pert cun 11 sföisc. Insciö á les scores ladines danman na bela cerna de indöt 27 unités interdisciplinares, partides ite te trëi liví de dificolté, olache Veronica Rubatscher, colaboradëssa  dl Ciamp pedagogich, á lauré fora le conzet y á albü la coordinaziun tles mans.

Les unités stlüj ite ativités didatiches desvalies, tres chëres che les mitans y i mituns vëgn inviá da ponsé do y da baié tl grup, da refleté sön le dër comportamënt osservan dessëgns proietá. Jüc de grup renforza la colaboraziun y le raport sozial, deperpo che aplicaziuns digitales dëida esploré y jí plü sot ti contignüs te na manira plü moderna. Tres chësta varieté vëgn les mitans y i mituns incorajá y renforzá te sües competënzes soziales, emozionales, linguistiches, inteletuales, ziviches, cooperatives y digitales.

La paleta de argomënc che vëgn dant se porta dal ambiënt al guant, dales cultures dl monn ai stödafüch, dai tiers dla munt al salüt … döt argomënc che interessëia les scolares y i scolars y che mostra sö i valurs dla vita da vigni de y de nosta Tera.

red