Scora / Cultura | 08.01.2026 | 14:40

"Cësa di Ladins": n pruiet deberieda per la identità ladina

La Provinzia de Bulsan y i Chemuns de Gherdëina fej ora deberieda de fé su da nuef l Museum y de nvië via n zënter de cultura – na cunvenzion regulamentea coche n se partësc su i custimënc

BULSAN (USP). Cun la sotscrizion dla cunvenzion per la „Cësa di Ladins“ à ai 8 de jené a Bulsan la Provinzia Autonóma de Bulsan y i cater Chemuns de Urtijëi, Santa Cristina, Sëlva y Ciastel renuvà y renfurzà si mpëni per mantenì y svilupé for inò la cultura ladina tla valeda de Gherdëina. L pruiet ie la fundamënta per na luegia zentrela dla grupa de rujeneda ladina y ie n sëni tler per la scunanza y per l sustëni dla mendranzes cultureles.

La „Cësa di Ladins“ a Urtijëi vën fata su da nuef per vester n zënter modern, funziunel y identiter, che ti dà ala cumenanza ladina na lerch te n tëmp plu lonch. L custimënt dut adum dl pruiet ie de 21,56 milions de euro, che vën sëurantëut deberieda danter Provinzia de Bulsan y i Chemuns che fej pea.

L presidënt dla Jonta provinziela de Bulsan Arno Kompatscher y i ambolc Tobia Moroder de Urtijëi, Christoph Senoner de S. Cristina, Tobias Nocker de Sëlva y Cristina Pallanch de Ciastel à auzà ora y sotrissà la mpurtanza dl pruiet per la cultura ladina. „La Cësa di Ladins sarà n sëni tler per la vivanda dl’identità ladina. La cunlieia storia, rujeneda y tradizion vivuda cun l daunì,” da coche à lecurdà l presidënt dla Jonta provinziela de Bulsan Kompatscher.

N elemënt zentrel dl pruiet ie l Museum Ladin de Gherdëina, che vën ratà coche cuer culturel dla storia ladina tla valeda de Gherdëina. L Museum giaperà locai da mëter ora moderns y a una cun i tëmps, che lascia pro che la storia, l’ert y la cultura da uni di posse unì dates inant. Tl medemo mumënt vëniel dat mpulsc nueves per la furmazion, per la tueda y nrescida y per l turism. Tla Cësa di Ladins giaperàl na si lerch la Biblioteca Ladina, Ufizies dla Union y n self multifunziunel.

Na mpurtanza particulera ti va nce ai locai nueves per la lies, che pieta na lerch de ancunteda, de barat y de mpëni de ulentariat. I renfurzea dassënn la strutura soziela y culturela dla cumenanza ladina. Lies, chiche fej ert y espunëntes y espunënc dla rujeneda y furmazion ladina giapa tlo n ncësa deberieda.

"Per nëus dla Union di Ladins de Gherdëina iel na gran legrëza che l proiet per la Cësa di Ladins nueva vënie for plu y plu cuncret. Cun n zënter culturel nuef puderons valorisé y lascé crëscer la rujeneda y la cultura ladina dla Dolomites. La Cësa di Ladins ne sarà nia mé na sënta dënia per la rujeneda y tradizion ladina, ma nce n pont d’ancunteda vif per nosta cumenanza. Ie ulësse rengrazië de cuer l Chemun de Urtijëi cun l ambolt Tobia Moroder, la Region, la Provinzia, i trëi chemuns de Gherdëina, l chemun de Ciastel y duta la jënt che à sustenì y che sustenirà nce tl daunì chësc zënter per nosta identità ladina."

pio