Scora / Cultura | 22.12.2025 | 14:44

Irene Prinoth nominada Direturia dl Istitut Ladin Micurá de Rü

Inciaria da direturia por Irene Prinoth da Urtijëi – dai 2 de forá 2026 rovënarára por bun cater agn l’istituziun culturala de gran importanza por les ladines y i ladins

BALSAN (USP). Ai 2 de forá surantól Irene Prinoth la direziun dl Istitut Ladin "Micurá de Rü". Tratan le concurs por arjunje la cualificaziun da "dirigënt/a de secundo livel" dl plan unitar di posc da dirigëntes y dirigënc dla Provinzia s’ára fat valëi pro la comisciun de ejam sides tl ejam a usc, pro la valutaziun di titui che ince tl assessment-center. Ince tla prozedöra de seleziun che ê tla responsabilité dl Diretur dl’Intendënza y Cultura ladina, él gnü confermé che i recuisic profescionai y personai corespogn ala posiziun spefizica, y insciö ti á le Diretur incö conferí l’inciaria dirigënziala.

"I ti feji les audanzes a Irene Prinoth por avëi superé n concurs por dirigënc esigënt, y al me fej plajëi che le dagní dl Istitut Ladin é ti proscims agn tles mans de na ëra competënta. I sun dla convinziun che ara portará inant le laur prezius de sü predezessurs y ch’ara ti dais tl medem momënt impulsc nüs al svilup dl Istitut – tres cun l’obietif da renforzé l’identité dla comunité ladina y da consolidé les poscibilités por le dagní dla mendranza ladina, so lingaz y süa cultura te na manira persistënta", spliga l’Assessur provinzial por la formaziun y cultura ladina Daniel Alfreider. "I oress ince tó l’ocajiun por rengrazié de cör Jürgen Runggaldier che á – dlungia süa inciaria da diretur dl’ufize por la cultura y jonëza ladina – rovenü por trëi agn ad interim l’Istitut cun gran sëns de responsabilité", insciö l’assessur.

"Irene Prinoth á competënzes organisatives, tecnich-aministratives y iuridiches evidëntes y á desmostré na comprenjiun y conescënza ampla dla situaziun y dles esigënzes dla mendranza ladina y dles mosöres de sconanza. Cun motivaziun y franchëza metarára man n capitul nü por l’Istitut Ladin Micurá de Rü: so compit ne sará nia ma da aministré l’istituziun con sües colaboradësses y colaboradus, mo da la rovëne y ti dé orientamënt cun na vijiun tlera por le dagní se basan sön süa funziun sciöche zënter de competënza dl Ladin y colaboran cun les atres realtés scientifiches y culturales", sotrissëia le Diretur dl’Intendënza y Cultura ladina André Comploi.

Irene Prinoth á stlüt jö sü stüdi de lege cun na tesa sura i dërc dles mendranzes meton i ladins en confrunt. Ara á fat esperiënzes profescionales sides tl ciamp privat, sides tl publich, cun n focus sön le dërt aministratif. Pro l’aministraziun provinziala s’ára porater dediché ala coordinaziun de prozedöres aministratives cun na certa complessité, a funziuns de consulënza y manajan colaboradësses y colaboradus. Tratan süa ativité da insegnanta tles scores altes ladines y tres so impëgn pro lies culturales ladines ára podü aprofondí sües conescënzes dl contest y dla realté linguistich-culturala ladina.

L’Istitut Ladin Micurá de Rü é sciöche ënt funzional dla Provinzia autonoma da Balsan le zënter de competënza por la inrescida, documentaziun y promoziun dl lingaz, dla storia y dla cultura ladina. Pro sües ativités alda publicaziuns, manifestaziuns y mostres, ince en colaboraziun cun universités y cun d’atres istituziuns scientifiches y culturales provinziales y foradecá. N punt zentral é da promöie y alisiré l’adoranza dl lingaz ladin y da mëte a desposiziun ressurses linguistiches, ti ultims agn tres deplü ince   cun l’aiüt de banches-dac digitales, linguistica dl computer aplicada y stromënc de traduziun che se basëia sön l’inteliënza artifiziala.

red