Scora / Cultura | 16.10.2025 | 08:00

Pension de njonta per artistes y artisć: cie ie pa da fé?

Cundizions per giapé tl 2026 n paiamënt suplementer – la rejon de fé dumanda à artistes y artisć de prufescion dla categuries ert figurativa y ert szenica, mujiga, leteratura, film

BULSAN (USP). Artistes y artisc che ulëssa giaudëi de n paiamënt suplementer per la pension da pert dla man publica dassëssa paië ite nchin ala fin dl ann te n fond de pension de njonta de si vela. L’artistes y i artisc che ulëssa se nuzé regularmënter dl fond de pension de njonta muessa uni ann pudëi mustré su de vester te chësta cundizions: per prima cossa muessel unì fat tl ann 2025 n paiamënt de almanco 500 Euro te n fond de pension de njonta. L’artistes y i artisc che paia tl ann 2025 nstësc ite te n fond de pension de njonta che ëiles/ëi possa crì ora, possa fé cont de giapé tl ann 2026 n suplemënt da pert dla man publica che va da 500 a 1000 Euro, sce si davani brutto ne superea tl ann 2025 nia la soma de ndut 40.000 Euro. Na segonda cundizion ie la iscrizion tl Register provinziel dl’artistes y di artisc. La dumanda muessa unì fata nchin al plu tert ai 31 de merz 2026 y chël respetivamënter ti ufizies per la cultura dla grupes linguistiches ladina, tudëscia o taliana. Y, terzo, iel po da damandé l paiamënt suplementer per la pension nchin ai 30 de nuvëmber 2026 pra l’Agenzia per l svilup soziel y economich ASSE Agentur für soziale und wirtschaftliche Entwicklung ASWE.

Chi che à bele l ann passà 2024 paià ite te n fond de pension de njonta possa nchin ai prim de dezëmber 2025 nstësc/nstësses o tres n patronat mandé ite tres e-mail la dumanda per la pension de njonta al’Agenzia ASSE. L cuntribut cunzedù curespuend ala soma che ie unida paieda ite dala damandënta/dal damandënt tl fond de pension de njonta (almanco 500 Euro y al plu 1000 Euro). L dërt de fé dumanda à artistes y artisc de prufescion dla categuries ert figurativa y ert szenica, mujiga, leteratura y film che ie dl Südtirol o che viv y lëura tlo da almanco doi ani.

“Nosta artistes y nosc artisc caraterisea l’identità culturela dl Südtirol – te duc i ciamps y lingac y te duta la formes espressives. Cun l paiamënt suplementer per la pension fajons n nvestimënt tl daunì de nosta cultura y tla persones che la mantën da vivanda", nsci l vizepresidënt dla Provinzia y assessëur Daniel Alfreider.

Cundizions d’azes

La persona che fej dumanda muessa tl mumënt che la fej dumanda vester residënta da almanco doi ani tla Region Trentin-Südtirol y sté tl Südtirol; la muessa vester scrita ite tl Register provinziel dl’artistes y di artisc, aldò dl articul 2/bis dla lege provinziela n. 9 di 27 de lugio 2015. L davani brutto cumplessif sometù a chëuta (respetivamënter tl ann dan che l vën fat dumanda) dla damandënta/dl damandënt ne daussa nia superé l lim mascim de 40.000 Euro. La persona che fej dumanda muessa nstëssa paië ite almanco 500 Euro te n fond de pension de njonta y ne daussa nia giaté na pension direta.

Per chësta mesura de sustëni, che ie adresseda dantaldut artistes jëunes y artisc jëuni che dejëuj si lëur coche prufescion prinzipela, vëniel uni ann metù a despusizion na soma de 500.000 Euro. Aministrei vën chisc scioldi dla Region dala doi Provinzies Südtirol y Trentin, aldò dla lege regiunela n. 4 dl 2020.

red