Scora / Cultura | 05.09.2025 | 16:37

Scumenciamënt de scola per passa 90.000 mutons y jëuni

Tla scoles dla valedes ladines scumëncel n lunesc la scola per 2.935 mutans y mutons y jëunes y jëuni.

BULSAN (USP). N lunesc ai 8 de setëmber scumëncia i mutons dla scolina la scolina y i sculeies la scola. A livel de Südtirol n iel de ndut 90.156 che scumëncia l ann de scola 2025/26.

De ndut 2.935 ie scric ite tla scoles y scolines dla valedes ladines de Südtirol. 590 va te na scolina dl raion de scolina Ladinia. Tla scola elementera n iel 1.145, per 221 de chisc saràl l prim ann de scola. 643 va tla mesanes de Gherdëina y dla Val Badia, 557 te na scola auta o tla prufesciunela dla valedes ladines. L ann de scola nuef, dij l assessëur ladin per la scola Daniel Alfreider, ie n mumënt mpurtant tla vita di jëuni: "Do la feries da d’instà se ncunforta bele trueps sun si cumpanies de scola. L sentimënt de cumenanza, che tol ite nce i nsenianc, ie n elemënt mpurtant acioche la scola posse jì bën. Ti mbince a duc i mutons y jëuni y nce a duc i nsenianc n ann de scola produtif, da suzes y che feje unì su l sentimënt de cumenanza."

De ndut 65.010 mutons y jëuni ie tl proscimo ann scric ite te na scola tudëscia. De chisc de ndut 11.237 te na scolina tudëscia, 20.527 te na scola elementera tudëscia, 12.531 te na scola mesana tudëscia, 12.314 te na scola auta tudëscia, 8.401 te na scola prufesciunela. "A unì de reviers do l instà ie sibe per i mutons y i jëuni ma nce per i nsenianc n mumënt de legrëza", da coche auza ora l assessëur provinziel Philipp Achammer. Rì deberieda, fé damat y lauré deberieda, oradechël l se giamië ora tla grupa fej unì su na rë mpurtanta de cumenanza danter mutons y jëuni: "Cialonse deberieda che i jëuni y si bujëns reste tl zënter de dut, y che l vënie jit ite dantaldut te si svilup persunel cun n sustëni aldò. Perchël ve mbinci a duc y a dutes n bon scumenciamënt y n ann de scola plën de suzesc", dij Achammer. 

Te scoles talianes se àl scrit ite de ndut 22.211 sculeies y sculées. "La cumpëida crësc, cie che ie n svilup che fej legrëza y che mostra su che la uferta furmativa tla scoles talianes vën ududa y sciazeda coche da na bona fundamënta, inuvativa y ntlujiva", da coche sotrissea l assessëur provinziel Marco Galateo.

red