Scora / Cultura | 20.06.2025 | 07:00

Novités tles direziuns dles scores dla Val Badia dal ann 2025/26

La direziun raionala de Badia y la direziun raionala d’Al Plan ciafára n diretur nü deperpo che la direziun dles Scores altes La Ila/Badia ciafará na direturia nöia

BADIA/AL PLAN (USP). Cun le mëteman dl ann de scora 2025/26, gnarál a se dé mudaziuns importantes te deplü direziuns scolastiches tla Val Badia. Les rajuns de chëstes novités é le pensionamënt de na direturia y la surantuta de inciaries nöies da pert di atri direturs tl ambit dl sistem formatif ladin.

Elena Pellegrini, che é sëgn la direturia dles Scores altes La Ila/Badia, passará ala Direziun provinziala Scolines y Scores ladines, olache ara sará la referënta por l’inclujiun. La direziun dles Scores altes La Ila/Badia ti gnará surandada a Monika Senoner, chëra che é atualmënter pröma colaboradëssa dla direziun raionala de Urtijëi, olache ara insëgna ladin. Ivan Senoner, insegnant de ladin tla direziun raionala de Sëlva, sará le diretur nü dla direziun raionala de Badia. La direziun raionala d’Al Plan gnará surantuta da Gustav Frenademez, insegnant de matematica y sciënzes tla scora mesana de San Martin de Tor.

Le vizepresidënt y assessur provinzial por la Formaziun y Cultura ladina, Daniel Alfreider, sotrissëia: “Tles valades ladines, olache la scora é situada te n contest plurilinguistich, él fondamental da podëi cunté sön na direziun scolastica che ais de bunes raisc tl teritore y che sides ince daverta al'inovaziun. Chësc é important sides por la cualité dl insegnamënt che por svilupé inant nosc model scolastich paritetich. I rengrazi la direturia nöia y i dui direturs nüs por la desponibilité y l’impëgn: i sun sigü che cun süa competënza y motivaziun darái n contribut de valüta por le manajamënt dl sistem formatif ladin.”

Le diretur provinzial dles Scolines y Scores ladines, Heinrich Videsott, se dij contënt di colaboradus nüs: “La direturia y i direturs nüs á madorí na buna esperiënza tl ciamp educatif y á desmostré de gran competënzes profescionales, y á spo passé cun suzes les prozedöres de seleziun. Ai é porchël arjigná ca deplëgn por podëi manajé sües istituziuns scolastiches cun vijiuns y capazités. I confidi te na bona colaboraziun y i ti aodi a dötes y a düc da tó sö les inciaries nöies cun tröpa ligrëza.”

red