Scora / Cultura | 13.06.2025 | 10:40

Ai 13 de jügn se röia l’ann de scora 2024-25: dac y azënc de svilup

Ai 13 de jügn se röia por indöt 2927 mitans y mituns l’ann de formaziun y istruziun 2024-25 - 298 scolares y scolares fajará l’ejam de Stat dla scora mesana y alta

BALSAN (USP). Ai 13 de jügn se röia por indöt 2927 mituns y mitans dles istituziuns formatives ladines l’ann de scolina y de scora 2024-25. 605 mitans y mituns á frecuenté la scolina, 1187 la scora primara, 628 la scora mesana, 483 la scora alta y 24 la scora profescionala.

“Chisc numeri ne respidlëia nia ma ci che é gnü a s’al dé a livel de organisaziun, mo cunta ince de n ann de scora intensif, caraterisé tresfora da n impëgn costant, acompagnamënt y responsabilité deboriada”, dij le Vize-Presidënt a Assessur Daniel Alfreider. “Al é sté n ann plëgn de creativité, de plurilinguism ví tles scores y de momënc cun gran emoziuns te nostes scores ladines. Le musical te cater lingac Ciüriachecena tla scora primara da Al Plan o le teater cun löms fosces Aborigen dl Lizeum d’ert Cademia en colaboraziun cun la Scora de musiga de Gherdëna é ma n per de ejëmpli.  Ince le proiet pilot Scora movimentada é gnü stlüt jö cun gran suzes -40 insegnanc y insegnantes á ciafé na formaziun aladô, por porté ite ciamó deplü le movimënt tla scora da vigni de. I savun düc tan important che al é da fá movimënt regolarmënter bele da pici insö por mantigní la sanité dl corp y dla mënt. Ala fin sotrissëia le Vize-Presidënt a Assessur Daniel Alfreider: “Nostes scolines y nostes scores n’é nia ma n post por imparé, mo tröp deplü -al é trus olache al vá deboriada vigni de mituns y mitans, families, insegnanc y insegnantes y döt le personal scolastich. Giulan de cör a düc canc chi che acompagnëia nüsc scolars y nostes scolares cun cör, paziënza y impëgn. Che l’isté sides n momënt da crësce inant nia ma tl savëi, mo ince tla ligrëza, tla curiosité y tla condivijiun.

Por les classes finales dla scora mesana y alta metarál tosc man i ejams de Stat. 228 scolares y scolars se presentará ai ejams dla 3. classa dla scora mesana; ai ejams de Stat dla scora alta y profescionala tolarál pert indöt 70 studëntes y studënc.

Tla Scora profescionala por l’artejanat artistich La Prufesciunela á 6 studëntes y studënc dla 3. classa stlüt jö l‘ejam de cualifica profescionala: 3 studëntes y studënc dla 4. classa á stlüt jö l‘ejam de diplom de formaziun ala profesciun.

I ejams dla scora mesana metará man atira do la fin dles leziuns y se rovará anter i 30 de jügn 2025. L’ejam de Stat dla scora alta metará man ai 18 de jügn cun la pröma proa scrita.

red