Scora / Cultura | 16.04.2025 | 09:25

Scolina: dat pro cumpëida de personal per 2025/2026

La Jonta provinziela dà pro l plann per l personal per la scolines ladines, talianes y tudësces per l ann de scola che vën

BULSAN/BALSAN (USP) Per l ann de scolina che vën 2025/2026 iel unì scrit ite 11.077 mutans y mutons te 265 scolines tudësces. Tla delibera vëniel determinà che la scolina de Persenon/Kinderdorf unirà dsareda. Oradechël uniràl dsarà 13 repartizions te cinch di set cërtli de furmazion; chësc ajache l ie manco iscrizions. L ie dal’autra pert da dì che l ie nce ulache l ie deplù iscrizions, a na maniera che deberieda cun i chemuns cumpetënc iel unì njënia ite 7 repartizions nueves per l ann de scola 2025/2026. Tla delibera àn nce inò lascià pro che personal pedagogich posse unì deliberà y nciarià coche cumpaniadëur/a de pruiet o per la derijënza de doi o plu scolines. “Nce sce l ie for manco y manco sculées y sculeies iel stat mesun mantenì l cuntingënt de personal y monce de l auzé de n sich. Cun stabltà crions mesuns per renfurzé l lëur tl raion dlongia cësa y de renfurzé la cumpetënzes de nosta/nosc cunlauradëures,” da coche ie dla minonga l assessëur Achammer. Per la diretëura provinziela dla scolines Helena Saltuari ie l focus tl sustëni dla pluralità dla scolines: “Cunfianza y stabltà tl cuntingënt dl personal ie la premetudes per la cualità pedagogica tla scolina. Nscila sons boni de nciarië l personal te na maniera desferenzieda y deplù dl drë’ viers, acioche sonse boni de cumpanië nosc mutons y nosta mutans sun si troi ndividuel de svilup y de mparé l miec che la va.”

Per l ann de scolina 2025/2026 ie 596 mutans y mutons scric ite tla 17 scolines ladines. "Nce sce la cumpëida dla mutans y di mutons tla scolines ladines ie jit n mumënt de reviers, sons stac boni de auzé de n sich l cuntingënt dl personal, per ti vester ala ndesfidedes nueves de n istitut de furmazion ntlujif," sotrissea l vizepresidënt dla Jonta provinziela y assessëur per la scola y cultura ladina Daniel Alfreider. L ntendënt ladin Heinrich Videsott auza ora che "de ndut iel per la scolines tla valedes ladines preudù 86 stieres a tëmp plën y sëuraprò 3 stieres de suplënza. Cun chësta ressurses de personal vëniel metù la premetudes per garantì inant l sustëni prufesciunel dla furmazion tla rujenedes y tla mujiga tla scolines ladines".

Tla scolina taliana iel unì mantenì l cuntingënt de personal cun 476,75 stieres. "Te duta la provinzia iel unì scrit ite 3.098 mutans y mutons, ti mënsc che vën pudëssa la cumpëida mo se ngrandì," spiega l sëurantendënt Vincenzo Gullotta. Per l assessëur Marco Galateo iel mpurtant che l sibe unì mantenì chëla stieres che ie preududes per ativiteies tla rujenedes tudëscia y nglëija. “Nscila pudons inant ti pité ai genitores che à nteres na uferta furmativa te plu rujenedes. Nce mutans y mutons cun bujëns particuleres giata te nosta scolines n cuntest sun mesura y adatà per mparé y per unì furmei/des.”

 

red