Scora / Cultura | 15.05.2024 | 11:45

Istitut Culturel Ladin: deliberà n sustëni finanziel

Per cumpré hardware, njins, mascins y mubilia giapa l Istitut Culturel Ladin "Micurá de Rü" 15.000 euro; chësc ie unì dat pro n merdi ai 14 de mei

L Istitut Culturel Ladin "Micurá de Rü" urganisea y sustën scumenciadives per l mantenimënt y l svilup dla rujeneda y cultura ladina. Dlongia l lëur de publicazion n con‘ dl raion – sibe per ladin che te d’autra rujenedes – ie na gran pert dl’ativiteies dl Istitut chëla de sustenì lies cultureles.

Dan trëi mënsc ova la Jonta provinziela deliberà l sustëni finanziel per l’atività culturela y per la agëndes de furmazion permanënta per l ann finanzier 2024 (l USP à respurtà). Tla senteda de n merdi ai 14 de mei àla tëut su la pruposta dl assessëur cumpetënt Daniel Alfreider de ti dé 15.000 euro per cumpré hardware, njins y mascins per pudëi ti jì do al’atività culturela ma nce per cumpré mubilia.

Sustëni dla rujeneda y cultura ladina

L Istitut Culturel Ladin "Micurá de Rü" ie na istituzion dl’aminstrazion provinziela de Bulsan y vën nscila finanzià n pert dala Provinzia. Per l’autra pert se finanzieiel sé nstës vendan libri y pitan servijes coche la traduzions dal tudësch y talian ti idioms badiot y gherdëina.

L Istitut Culturel Ladin à scumencià a lauré ufizielmënter ai 3 de setëmber dl 1977. La sënta prinzipela dl Istitut Culturel Ladin ie a San Martin de Tor tla Val Badia, na si filiela iel te Sëlva te Gherdëina.

L Istitut à giapà si inuem dal linguista y preve ladin Micurá de Rü, per tudësch Nikolaus Bacher, che ie nasciù tl ann 1789 a Rü a San Ciascian y mort tl 1847 ora a Wilten/Dispuch.

Clican chiló röiun ala verjiun originala dl comunicat stampa por visualisé imajes, documënc o video che taca lapró

mac/dl