Scora / Cultura | 16.04.2024 | 16:22

Educazion etica: La jonta provinziela da pro la ndicazions

Cun l’apruvazion dla ndicazions provinzieles y la definizion di fins spartii su te livei scolastics defrënc, vëniel fat l proscimo var per nvië via l’ëura de etica tla scoles.

Tla scoles tudësces y ladines dla provinzia de Bulsan possa tl proscimo ann scolastich 2024/25 unì nvià via l nseniamënt de etica. L se trata de na alternativa formativa de ublianza per chëla sculées y chëi sculeies che ne tol nia pert al’ëura de religion. A mez merz ova la jonta provinziela bele dat pro l regulamënt y ncuei (16 auril) ie la ndicazions per la scoles tudësces y ladines unì apruvedes sun pruposta di assessëures provinziei Philipp Achammer y Daniel Alfreider.

Stabilì vëniel tlo dant al dut i fins formatifs urientei de viers dla cumpetënzes, spartii su te livei scolastics defrënc. Tla scoles primeres, mesanes, autes y prufesciuneles vala de tò su cumpetënzes ti aspec "Vester persona: ancunté sé nstësc", "Cunviver: ancunté l auter", "Persona, natura y tecnica: ancunté l mond" coche nce "Cultura y religion: ancunté la vita".

Coche scienza de basa nes juda tlo la filosofia, ma mpulsc mpurtanc vëniel nce da d’autra disciplines che trata l cumpurtamënt y la cundizion umana. "Cun l nvië via graduel dl nseniamënt de etica tla scoles de Südtirol pitons na educazion ai valores unich a livel statel, che dëssa cuntribuì a fé deventé nosta sculées y nosc sculeies cumëmbri atifs de nosta sozietà” dij l assessëur Philipp Achammer. Nce l assessëur Daniel Alfreider vëija l nvië via y la realisazion dl nseniamënt de etica scialdi de bon uedl: "Manejé la varietà culturela te tlas devënta for plu mpurtant. Pensé do y mparé sun co cunviver miec, co sciazé l5a persones y la natura ntëurvia, co ancunté sé nstësc y l proscimo ie fundamentel y de gran mpurtanza per la sozietà dl daunì." "La ntroduzion dl’ëura de etica ie scialdi bënunida, ajache la ti pieta a duta la sculées y duc i sculeies la puscibltà de se dé ju cun prinzips etics y valores mpurtanc”, auza nce ora la ntendënta ladina Edith Ploner.

La lezion de etica dëssa unì a se l dé man man tl proscimo ann de scola 2024/25. Scumencià vëniel d'autonn te de plu scoles pilot. Udù dant iel de ativé tla scoles primeres, mesanes, autes y prufesciuneles de prinzip tan de ëures de educazion etica coche l ie udù dant per la materia de religion. Chi che tol la dezijion de tò pert ala lezion de etica, l fej de regula per dut l livel scolastich, ora che sce l fej al savëi, nchin ai 30 de juni, de ulëi l ann do tò pert ala lezion de religion.

La materia de educazion etica possa, aldò dl regulamënt dat pro ai 19 de merz, unì nsenieda da maestres o maestri de uni materia, che à la abilitazion per scoles stateles, che desmostra de avëi stlut ju n curs spezifich de etica o avëi fat n stude universiter o n master de etica. Dla urganisazion y dla realisazion dl nseniamënt de etica se cruzia la singula scoles. Coche l vën avisa metù a jì depënt dala cumpëida de sculées y sculeies. Sce l nseniamënt vën pità tres dis de proiet, muessel unì garantì almanco 25 ëura per ann scolatisch.

Clican chiló röiun ala verjiun originala dl comunicat stampa por visualisé imajes, documënc o video che taca lapró

ck