Aministraziun | 09.08.2023 | 09:30

Plöra por le diretur de repartiziun Vito Zingerle

L'aministraziun provinziala plöra le diretur de repartiziun Inovaziun, Inrescida, Université y Museums, Vito Zingerle, che é mort inier, ai 7 de agost, ala eté de 53 agn. 

Él mort Vito Zingerle, diretur dla repartiziun Inovaziun, Inrescida, Université y Museums dla Provinzia. Al â 53 agn, y al ê a ce dla repartiziun dal altonn 2017 incá.

"Cun la mort de Vito Zingerle, antergnüda trö' massa adora, perd l'aministraziun provinziala na porsona dales gran capacités y cun na gra motivaziun. Zingerle â cualités umanes straordinares, al savô da motivé i colaboradus y portâ pro n gran savëi cun de beles manires, y mostrâ demeztrú la direziun da tó" dij le presidënt dla Provinzia, Arno Kompatscher. "Chësta mort pësa dassën. Nostes condolianzes plü sintides ti vá ala familia."

Ince le diretur dl ressort, Ulrich Stofner, dij fora so gran desplajëi por la mort de Vito Zingerle: "Vito Zingerle ê na porsona che dê ca düt cant por süa profesciun. Pasciun, capazité manageriala y ligrëza ê sües mersces. I arun mancia süa profescionalité y süa amizizia". 

"Cun Vito Zingerle perd l'aministraziun provinziala na porsona esemplara, n scienzié apascioné y n cumpagn de gran spessur uman" dij le vize diretur de repartiziun, Franz Schöpf. Döta l'aministraziun, i colaboradus y les les colaboradësses dla repartiziun Inovaziun, Inrescida, Université y Museums se portará daite n gran bel recort de Vito Zingerle, y ti fej les condolianzes a sü familiars. 

Vito Zingerle á naota studié Biologia a Desproch, y spo ál stlüt jö cun ezelënza i stüdi de Zoologia y Oncologia. Tl 1999 ál stlüt jö le dotorat, tres cun ezelënza. Originar dla Val Badia, ál surantut l'ann 2001 la coordinaziun dl Museum natural, de chël che al é spo sté diretur dal 2005 al 2017, canche al á surantut la direziun dla repartiziun Inovaziun, Inrescida, Université y Museums.

Clican chiló röiun ala verjiun originala dl comunicat stampa por visualisé imajes, documënc o video che taca lapró

ck/cs