Aministraziun | 10.05.2023 | 11:40

Pension de njonta per artistes y artisć: trëi cundizions

Artistes y artisć che ulëssa se damandé na njonta ala pension muessa avëi paià ite nstësc te n fond de njonta ala pension, les/i muessa vester scric ite tl Register di artisć y fé dumanda.

La fundamënta giuridica per sustenì l’artistes y i artisc te si segurazion pensionistica ie unida crieda ala fin dl ann 2020 cun la lege regiunela n. 4. Ntant à la repartizions provinzieles per la Cultura deberieda cun la l’Ajentura per l Svilup soziel y economich (ASWE) metù ndroa la mesura per nosta provinzia.

L ie de bujën d’avëi paià ite tl fond pensionistich de njonta

L’artistes y i artisc che à nstësc paià ite tl ann 2022 te n fond pensionistich de njonta che les/i se à cris ora possa tenì cont de na njonta de 500 euro tres la man publica. Per chësta mesura iel a despusizion 500.000 euro al ann.

Na cundizion per pudëi fé dumanda de n paiamënt de njonta ala pension ie la iscrizion tl Register provinziel dl’artistes y di artisc. Chësta iscrizion muessa unì fata nchi ai 31 de mei de uni ann, nsci nce tl 2023, y chël tl Ufize per la Cultura ladin, tudësch o talian. La dumanda de n paiamënt de njonta ala pension ie pona da fé nchin ai 30 de nuvëmber de uni ann, nsci nce tl 2023 pra l’ Ajentura per l Svilup soziel y economich (ASWE). Artistes y artisc che ulëssa na cuntinuazion de chësc sustëni muessa se scrì ite uni ann tl Register provinziel.

Iscrizion tl Register provinziel

L dërt de fé dumanda à artistes y artisc che lëura ti ciamps dl’ert figurativa y dl’ert reprejentativa, dla mujiga, dla leteratura y dl film. I/Les muessa unì dal Südtirol o viver y lëuré da almanco doi ani tl Südtirol y avëi n davani al ann che ne superea nia i 35.000 euro. Chiche ulëssa tl ann che vën giaudëi de chësta mesura preventiva de njonta pensionistica per artistes y artisc muessa chëst ann paië ite nstësc si soma de 500 euro te n fond de njonta pensionistica che les/i se chier ora.

Delà dla giaudënza dl paiamënt de njonta ala pension possa duta l’artistes liedies y duc i artisc liedesc che à la residënza te nosta provinzia se scrì ite tl Register provinziel dl’artistes y di artisc. Chësta iscrizion vel per cater ani y ne muessa nia unì renuveda uni ann. Chëles y chëi che se à scrit ite l ann passà tl Register provinziel dl’artistes y di artisc, ma che ne à tl 2022 nia paià ite n si cuntribut te n fond de njonta, ne muessa chëst ann nia fé dumanda de iscrizion te chësc Register, ma permò inò n auter ann.

Per chësta mesura che ie penseda dantaldut per artistes liedies jëunes y artisc liedesc jëuni per chëi/chëles che l’ert ie la prufescion prinzipela, vëniel uni ann metù a despusizion na soma de 500.000 euro. I mesuns vën aministrei dala doi provinzies Südtirol y Trentin.

Clican chiló röiun ala verjiun originala dl comunicat stampa por visualisé imajes, documënc o video che taca lapró

jw/usp