Aministraziun | 24.01.2023 | 13:00

L USP tol per l prim iede su praticanc jurnalisć: l cuncors ie daviert

L Ufize stampa chier doi persones nciariedes dla nfurmazions. Les possa fé l praticantat che ie na cundizion per unì lascedes pro pra l ejam de jurnalism. L ie puscibl fé dumanda nchin ai 27 de fauré.

Per l prim iede possa persones che ulëssa deventé jurnalistes y jurnalisc fé tl Ufize stampa provinziel n praticantat de 18 mënsc che ie cundizion per fé l ejam de stat. L Ufize personal provinziel à scrit ora n cuncors de stieres tres chël che l dëssa unì ocupà doi stieres a tëmp plën coche “persones nciariedes dla nfurmazions” tl Ufize stampa dl’Ajentura provinziela per la stampa y la comunicazion a Bulsan per l tëmp de 18 mënsc. Chiche ëssa da vëncer l cuncors unirà pona scric ite tl register statel di jurnalisc y dla jurnalistes sciche praticanc y praticantes. Per pudëi tò pert al cuncors provinziel per persones nciariedes dla nfurmazions iel de bujën avëi l ejam de madurtà de na scola auta sciche nce l atestat de bilinguism B2 (n iede livel B). I ladins y la ladines muessa oradechël avëi passà l ejam de ladin B2.

La doi stieres ie resservedes ala persones dla grupa linguistica taliana y ladina. Purempò possa nce i candidac y la candidates de rujeneda tudëscia tò pert al cuncors provinziel. Sce l ie po de bujën y sce l fossa n cajo mo stieres a despusizion, possa candidates y candidac adatei aldò dl urdinamënt dla graduatories di cuncorsc unì tëuc su per l tëmp de 18 mënsc.

L cheder prufesciunel "persona nciarieda dla nfurmazions" ie preudù dal 2021 cun l cuntrat culetif nuef per jurnalistes y jurnalisc dl’aministrazion publica per fé a na moda che l sibe puscibl dejëujer n praticantat da jurnalistes y jurnalisc tl Ufize stampa provinziel.

Tiermul per dé ju la dumandes: 27 de fauré 

La ndizion dl cuncors ie publichda sun la plates web dla Provinzia pra la tematica Personal sot ala parola tle cuncorsc y tl Buletin ufiziel dla Region. L ie mesun fé dumanda per tò pert al cuncors nchin ai 27 de fauré 2023 (dala 12:00) tl Ufize provinziel per l’assunzion de personal, y chël tres l’adres e-mail zertificheda personalaufnahme.assunzionipersonale@pec.prov.bz.it, tres e-mail normala al’adres Personalaufnahme@provinz.bz.it o tres posta recumandeda al Ufize provinziel per l’assunzion de personal, streda Renon 13 a Bulsan.

Clican chiló röiun ala verjiun originala dl comunicat stampa por visualisé imajes, documënc o video che taca lapró

jw