Hauptinhalt

La bandira dla Provinzia autonoma de Balsan-Südtirol

bandiraAladô dl art. 3 dl Statut de Autonomia Nü à la Provinzia de Balsan-Südtirol le dërt d’avëi dlungia so blasun, inće na süa bandira. Le blasun dla Provinzia é bele gnü aprovè dl 1983, la bandira à impormò ciafè süa aprovaziun definitiva dales autoritês competëntes a livel nazional tl altonn dl 1996. Sön domanda dla Junta provinziala (deliberaziun al’unanimité di 7 d’otober dl 1996) é la bandira gnüda aprovada cun decret dl Presidënt dla Republica di 22 de novëmber dl 1996.

La bandira dla Provinzia autonoma de Balsan-Südtirol é n drap blanch y cöce che à itamez le blasun dla Provinzia cun chësta scrita d’or ti trëi lingac: “AUTONOME PROVINZ BOZEN SÜDTIROL ” (sön la pert blanćia), “PROVINCIA AUTONOMA DI BOLZANO ALTO ADIGE” (sön la pert cöcena) y “PROVINZIA AUTÓNOMA DE BULSAN SÜDTIROL” (en pert sön la pert blanćia y en pert sön la pert cöcena). Les perts de metal é indorades, incër la stangia él intorcorè sö na vëta de lüch dai medemi corusc dla bandira. Sön la piza dla lanza él le blasun dla Provinzia.

Spligaziun storica:

I corusc blanch y cöce dla vedla bandira dl Tirol y dla bandira dl Südtirol vëgn, sciöche al é porater te de plü posć, dai corusc dl vedl blasun dl Tirol. Chësc blasun – n variöl cöce sön n funz arjentè (blanch) é gnü dè inant a corusc dal 1271-1286. La rafiguraziun plü vedla é l’afrësch tla capela de Ćiastel Tirol che va zoruch a chësc tëmp. Na descriziun olache al vëgn fat referimënt ai corusc, é da ciafè tla poesia dl blasun (Cliperius Teutonicorum) dl canonich Konrad von Mure incër l’ann 1250:

„Fert aquilam Tyrolis clipeus prestante rubore, que nigri pedis est alias albente colore"
(Le scü blanch dl Tirol à n variöl dal corù cöce scraiënt y dales grifes fosces).

Dal catordejim secul incà é les grifes y le bech dl variöl indorà.