Paiamënt a rates dles spëises prozessuales

Tl caje de debic nia fiscai pón damané da paié a rates (Decret dl Presidënt dla Junta provinziala di 13 de setëmber dl 1999, n. 49 “Regolamënt sön le paiamënt a rates di credic dla Provinzia”).
Chësta poscibilité vel ince por che che mëss paié les spëises prozessuales a bëgn dl’Aministraziun provinziala.
Les modalités de conzesciun de chësta alisiraziun é fissades tla zircolara dl Diretur dl Ofize Entrades n. 1 di 11.01.2000 (Decret dl Presidënt dla Provinzia di 13 de setëmber dl 1999, n. 49 “Regolamënt sön le paiamënt a rates di credic dla Provinzia”).

Modalités da fá domanda

La domanda de paiamënt a rates mëss gní scrita fora sön cherta bolada y dada jö tl ofize dl’Avocatöra che se crüzia dl prozes.
Le debitur mëss detlarè sot süa responsabilité, che al n'é nia bun da paié le debit cina le termin fat fora y dé dant ciodí.
L’ofize competënt ti lascia alsavëi al debitur ci documënc che al é da ajunté ala domanda (p.ej. detlaraziun dl davagn, bilanz, iscriziun tles listes dl laur o de mobilité, documentaziun sön na situaziun familiara o sanitara particolara, documënc bancars, y i.i.).
Ara vá da desmostré la situaziun economica y de davagn ajuntan ince na detlaraziun sostitutiva dl at de notorieté.
Pro les domandes che reverda debic cina 25.822,84 euro él le diretur o la direturia de repartiziun che tol na dezijiun; pro les domandes che reverda debic sura 25.822,84 euro él la Junta provinziala che tol na dezijiun; te chësc caje mëssel gní dé na garanzia adatada.
La Repartiziun provinziala Finanzes mëss ester a öna cun la conzesciun dl paiamënt a rates.

Conzesciun de n termin de paiamënt arlungé y sospenjiun dl scodimënt

Le numer y l’amunta dles rates da paié vëgn determinades cun decret dl diretur o dla direturia dla Repartiziun Avocatöra.
Al'amunta dles rates vëgnel ajunté i fic sön le capital aladô dla spana legala.
La rata mensila toma l’ultimo de dl mëis. Sce le termin toma de sabeda, domënia o n de de festa, póra gní paiada le pröm de da laur dedô.
Sön domanda dl debitur pó le scodimënt gní tigní sö por n ann alalungia y, dedô pó la repartiziun fá fora che al vëgnes paié te alplü 48 rates al mëis. Sön les somes dl paiamënt tigní sö vëgnel apliché i fic dl 6 porcënt.

Revocaziun dl’alisiraziun

L’alisiraziun vëgn trata zoruch sce al n'é nia plü les condiziuns che á portè ala conzesciun y al é prigo che la soma ne vëgnes nia plü retüda.