Contrac

L’Avocatöra surantol la rapresentanza dan signoria di dërc y di interesc dla Provinzia, dles aziëndes provinziales y di ënc provinziai, sciöche ince de sü organs, por ci che reverda les stritaries che podess gní a se le dé da bandides publiches y contrac stlüc jö.
Pro les chestiuns de strit dan le Tribunal aministratif – Seziun Autonoma por la Provinzia de Balsan – y dan le Consëi de stat, nen vára dantadöt de recursc cuntra la publicaziun di concursc y i provedimënc de conferimënt cun lapró i dërc d’indenisaziun, cuntra i provedimënc cun chi che al é gnü refodé l’azes ai documënc dl prozedimënt y cuntra i provedimënc cun chi che al é gnü desponü la revocaziun di contribuc provinziai conzedüs.
Les prozedöres de strit dan la Curt de Cassaziun reverda dantadöt les ghiranzes d’indenisaziun, le reconescimënt dles resserves scrites ite tl register de contabilité, l’anulamënt di contrac, les plüres de usucapiun, les plüres de desfratada y les lamentanzes dl liber fondiar.
Chësta ativité reverda  la redaziun di ac dles plüres o di recursc fac da terzi cuntra la Provinzia y i ënc nominá dessura, sciöche ince la realisaziun de scric de plüres o recursc dla Provinzia cuntra terzi. Pro l'ativité dl'Avocatöra alda ince la partezipaziun ales udiënzes dan signoria, la nominaziun de esperc de pert y le sostëgn de avocac esterns/avocates esternes sce al vá debojëgn.
L’Avocatöra se crüzia ince da informé tresfora les repartiziuns atocades dala chestiun de strit, y da les aconsié porsura l’utilité de miré a ciafé na soluziun zënza jí dan signoria, che dess se porté pro tratan la prozedöra.
Te chësc caje vëgnel lauré fora, do avëi ciafé l’arat positif dla repartiziun atocada y l’autorisaziun dala Junta provinziala, le contrat de comparaziun sciöche fat fora cun la pert aversara.
Do avëi stlüt jö la comparaziun se crüzion de süa atuaziun y an ciara che ince la pert aversara se tëgnes a ci che é gnü fat fora y l'atuëies.