Consulënza legala

Ejam de normes provinziales

L’Avocatöra se crüzia de ejaminé y en pert ince da elaboré les normes. Chëstes vëgn deliberades dala Junta provinziala sot forma de regolamëc de esecuziun sciöche leges provinziales y emanades dal Presidënt dla Provinzia cun n so decret, o proponüdes dala Junta provinziala sot forma de propostes de lege sciöche dessëgns de lege governatifs al Consëi provinzial.
Naota vëgneres ejaminades dal punt de odüda costituzional. Al vëgn ciaré che ares ne vais nia cuntra la Costituziun, chël ó dí che ares ne reverdes nia competënzes che ne n'é nia dla Provinzia y ne n'é nia fissades tl Statut d’Autonomia o che al ne vëgnes nia violé prinzips costituzionai.
Implü mëssel ince gní ejaminé y controlé sce ares é conform ales desposiziuns dla Uniun Europeica gerarchicamënter superiures.
L’Avocatöra á elaboré les “Diretives de tecnica legislativa”, contignüdes tla zircolara dl diretur general di 02.01.1997, a na moda da arjunje criters de strotöra y forma uniforms tla redaziun di tesć normatifs. A chëstes diretives él da se tigní avisa por arjunje n standard minim de tecnica legislativa y porté pro a chësta moda a mioré la cualité dla produziun legislativa provinziala.

Cursc d’ajornamënt

Les colaboradësses y i colaboradus dl Raiun Sorvisc legal tëgn referac tl cheder de cursc d’ajornamënt interns por i dirigënc, i esperc dl personal provinzial, dl personal dles scores y ince de d’atri ënc publics.
I cursc vëgn pitá dantadöt te chisc ciamps ti trëi lingac provinziai:

  • formulaziun de moziuns;
  • responsabilité di impiegac publics y dl personal dles scores;
  • infliziun de sanziuns aministratives;
  • prinzips dl’Autonomia dl Südtirol;
  • prozedöra aministrativa;
  • pretenjiun ilegitima de alisiraziuns economiches;
  • azes ai documënc aministratifs y proteziun di dac.

Le curs „Burocratese - no grazie!“ che vëgn metü a jí é metü adöm da dui modui; l’aspet linguistich vëgn traté dal Ofize Chestiuns linguistiches y chël iuridich dala direturia dl'Avocatöra.

Consulënza iuridich-aministrativa

L'Avocatura se crüzia dla consulënza iuridich-aministrativa dl'aministraziun provinziala. La consulënza pó gní fata te chisc cater ciamps:

Le Raiun Sorvisc legal pîta, ma sön domanda dles repartiziuns dl’Aministraziun provinziala, la consulënza legala te ciamps che ne toma nia tles competënzes dl Raiun Sorvisc contrac y dl Raiun Sorvisc legal por le teritore.
Feter dötes les repartiziuns provinziales, cun lapró les trëi Intendënzes, les scores y i ënc stromentai dla Provinzia, damana do arac legai. En linia de prinzip ne pó l’Avocatöra dla Provinzia nia dé jö arac legai por i Comuns o d’atri ënc autonoms, sciöche les Comunités raionales y l’Aziënda sanitara dl Südtirol.
L’ativité de consulënza reverda düc i ciamps dl dërt: le dërt zivil y penal, le dërt europeich, le dërt tributar, le dërt comerzial, le dërt dl laur, de dërt d’insolvënza, le dërt d’autur, y i.i., y dantadöt le dërt aministratif en general y le dërt prozessual aministratif.
Tröc arac reverda chestiuns spezifiches sön l’azes ai documënc, la sconanza di dac personai, la scemplificaziun dl’aministraziun, y ince i prozedimënc de aplicaziun de sanziuns aministratives.
Pro la redaziun di arac vëgnel dantadöt ciaré, canche an controlëia y ejaminëia les desposiziuns provinziales, che ares sides compatibiles cun les desposiziuns statales y comunitares.
Chësc ó dí afronté ince sovënz chestiuns sön la legitimité costituzionala dles desposiziuns statales y provinziales, y chestiuns sön les competënzes aministratives y legislatives dla Provinzia autonoma de Balsan.
Le Raiun Sorvisc legal dá ince jö arac sön les comparaziuns y la desmetüda dles prozedöres iudiziares.
Tröpes consulënzes legales vëgn ince fates a usc. La consulënza legala tol ite tröc d’atri ac y tröpes d’atres prozedöres che reverda les anunzies de ghiranza tla prozedöra de concurs, les prozedöres de retüda di dagns extraiudiziales, i ac che reverda la ghiranza de retüda dles spëises de ospedal, les revocaziuns y les ghiranzes de retüda de contribuc y de alisiraziuns dl frabiché, les prozedöres de assegnaziun de raiuns produtifs, l’aplicaziuns de sanziuns aministratives, y i.i.

Agricoltöra y bosć

La consulënza iuridich-aministrativa vëgn dada da n avocat/n'avocata dl’Avocatöra dla Provinzia, che se crüzia ma dl’agricoltöra y di bosć, dl'urbanistica, dla sconanza dla contrada y dl ambiënt. Ma i ofizi y les repartiziuns dl’Aministraziun provinziala pó s’anuzé de chësc sorvisc. La consulënza vëgn fornida a usc o tres arac legai y reverda dantadöt chisc ciamps:

  • salvarjina y ciacia,
  • sconanza dl monn di tiers y prevenziun dl rodé intoronn de tiers,
  • comerzialisaziun y igiena de alimënc da tiers,
  • trafich de auti te raiuns sconá por rajuns idrogeologiches,
  • pra te bosch y te raiuns degradá,
  • movimënt dla tera y deponüda de material,
  • mudaziun dles coltivaziuns,
  • jí a fonguns,
  • taié lëgns,
  • jí a pié pësc,
  • vacanzes sön le lüch da paur,
  • bonificaziun,
  • sconanza dles coltivaziuns da paur y dles ês, sciöche ince verda dles scores de lëgns da ordöra,
  • sconanza dl’aria,
  • proteziun cuntra la vera,
  • sconanza dles eghes,
  • economia dl ciomënt
  • y i.i.

La consulënza legala por ci che reverda i contrac vëgn ma fata sön domanda dles Repartiziuns dl’aministraziun provinziala, y dantadöt te chisc caji:

  • prozedöra de cerna di contratanc tl cheder de gares por inciaries de fornidöres – y sorvisc;
  • ejaminaziun legala de sböc dles condiziuns de partezipaziun por surandé les inciaries de fornidöres y sorvisc, sciöche ince por les lizites publiches;
  • chestiuns legales liades al’aministraziun, al anulamënt y al renovamënt de contrac olache la Provinzia Autonoma de Balsan é öna dles perts contraëntes;
  • ejaminaziun dles condiziuns legales por la cumpra y venüda de bëgns mobii;
  • ejaminaziun legala de sböc de acordanzes y contrac d’esecuziun di laurs;
  • arac che reverda la prozedöra aministrativa.