Lîtes de comun

Lites de comun di 20.09.2020 y di 21.09.2020 - Termin dles lites general

Ai 20 y ai 21 de setëmber dl 2020 vëgnel tigní le Termin dles lites general por i comuns dl Südtirol. Le termin de litaziun dezisiva eventual gnará tigní ai 4 d’otober dl 2020. Les lites de comun toma adöm cun le referendum costituzional confermatif revardënt la reduziun dl numer di parlamentars.

Le termin dles lites de ma ê gnü sburlé porvia dl'emergënza epidemiologica gaujada dal COVID-19. Le termin nü é gnü fissé cun decret dl Presidënt dla Regiun n. 33 di 13 de messé dl 2020.

Ales lites comunales tolel pert 113 comuns dla Provinzia de Balsan. Ti comuns de Nöia Todëscia, Freienfeld y Sarntal é les lites comunales bele stades dl 2019 y porchël ne i reverda chësc termin dles lites nia.

Chësc é le link dla plata web olache al é les listes y i candidac y les candidates de düc i comuns y olache al gnará publiché i resultac dles lîtes de comun, do che al sará gnü cumpedé fora les usc: https://www.gemeindewahlen.bz.it/lld/.

Proteziun de sëgns de lista tradizionai

Codesc di ënc locai dla Regiun Autonoma Trentin-Südtirol - articul 220

I partis o grups politics organisá pó dé jö pro la Presidënza dla Provinzia, nia dan les 8.00 dl 45ejim de y nia do les 20.00 dl 44ejim de dan le de dla lîta, sü sëgns de lista cun chi che ai ó desfarenzié sües listes dala lîta dl consëi comunal.

Chësta deponüda mëss gní fata dal secreter regional o provinzial o, sce al n'é nia, mancia o ne sciafia nia, dal presidënt regional o provinzial dl partí o ragrupamënt politich, o da na porsona che é gnüda inciariada da d'ëi cun n mandat autentiché da n notar. Sce chisc organs ne vëgn nia preodüs dai statuc relatifs o n’é nia en ciaria por ci rajun chessî, pó la deponüda gní fata y le mandat relatif gní conzedü dal dirigënt regional o provinzial dl partí o dl ragrupamënt politich. L'inciaria di depositanc o di mandanc mëss gní desmostrada cun atestaziuns de sü secreters o presidënc nazionai, tl caje de n’organisaziun nazionala, o cun estrac autentics di verbai de nominaziun relatifs, tl caje de n’organisaziun locala.

Al mëss gní dé jö trëi ejemplars dl sëgn de lista, ince da corusc y sön na plata blancia tl format protocol (cun n diameter de 10 cm). Le sëgn de lista mëss ince gní dé jö tla forma digitala, tl format vetorial y implü te un de chisc formac: “jpeg”, "png" o “pdf”.

Al n'é nia conzedü da dé jö sëgns de lista anfat a chi bele dá jö y ametüs ala deponüda, o a chi che á simboi adorá de regola da d'atri partis, o sëgns de lista che é ris da desfarenzié da chisc. Al n'é gnanca conzedü che partis o ragrupamënc politics dais jö sëgns de lista cun simboi o elemënc che caraterisëia simboi che vëgn tradizionalmënter adorá da partis o ragrupamënc politics che é tl Consëi provinzial, y che pó insciö ingiané le litadú. An ne pó gnanca dé jö sëgns de lista cun simboi o sogec religiusc.

Publicaziun di sëgns de lista depositá

Cun chësta publicaziun ti lascia le Presidënt dla Provinzia alsavëi al publich i sëgns de lista che é gnüs lasciá pro a deponüda ai 6 y ai 7 d’agost dl 2020. La publicaziun vëgn fata alplü tert en lönesc, ai 10 d’agost dl 2020. I sëgns de lista vëgn publicá orizontalmënter, aladô dl ordin stabilí tres estraziun.

Al vëgn avisé che d'atri partis o ragrupamënc politics organisá ne pó nia adoré i medemi sëgns o sëgns che é ris da desfarenzié da chi dá dant dessura.

 

Balsan, ai 8 d’agost dl 2020

Le Presidënt dla Provinzia

Dot. Arno Kompatscher