Lîtes de comun

Lîtes dl Comun de Nöia Todëscia di 17.11.2019

Ai 17 de novëmber 2019 vëgnel tigní les lîtes dl ombolt y dl Consëi comunal dl Comun de Nöia Todëscia.

Proteziun de sëgns de lista tradizionai

CODESC DI ËNC LOCAI DLA REGIUN AUTONOMA TRENTIN-SÜDTIROL - articul 220

I partis o grups politics organisá pó dé jö pro la Presidënza dla Provinzia, nia dan les 8.00 dl 45ejim de y nia do les 20.00 dl 44ejim de dan le de dla lîta, sü sëgns de lista cun chi che ai ó desfarenzié sües listes dala lîta dl consëi comunal.

Chësta deponüda mëss gní fata dal secreter regional o provinzial o, sce al n'é nia, mancia o ne sciafia nia, dal presidënt regional o provinzial dl partí o ragrupamënt politich, o da na porsona che é gnüda inciariada da d'ëi cun n mandat autentiché da n notar. Sce chisc organs ne vëgn nia preodüs dai statuc relatifs o n’é nia en ciaria por ci rajun chessî, pó la deponüda gní fata y le mandat relatif gní conzedü dal dirigënt regional o provinzial dl partí o dl ragrupamënt politich. L'inciaria di depositanc o di mandanc mëss gní desmostrada cun atestaziuns de sü secreters o presidënc nazionai, tl caje de n’organisaziun nazionala, o cun estrac autentics di verbai de nominaziun relatifs, tl caje de n’organisaziun locala.

Al mëss gní dé jö trëi ejemplars dl sëgn de lista, ince da corusc y sön na plata blancia tl format protocol.

Al n'é nia conzedü da dé jö sëgns de lista anfat a chi bele dá jö y ametüs ala deponüda, o a chi che á simboi adorá de regola da d'atri partis, o sëgns de lista che é ris da desfarenzié da chisc. Al n'é gnanca conzedü che partis o ragrupamënc politics dais jö sëgns de lista cun simboi o elemënc che caraterisëia simboi che vëgn tradizionalmënter adorá da partis o ragrupamënc politics che é tl Consëi provinzial, y che pó insciö ingiané le litadú. An ne pó gnanca dé jö sëgns de lista cun simboi o sogec religiusc.

Publicaziun di sëgns de lista depositá

Cun chësta publicaziun ti lascia le Presidënt dla Provinzia alsavëi al publich i sëgns de lista depositá. La publicaziun vëgn fata alplü tert le 37ejim de dan da chël dla lîta. I sëgns de lista vëgn publicá orizontalmënter, aladô dl ordin stabilí tres estraziun. Al'estraziun pól tó pert, sce ai s'al damana, i rapresentanc di partis o ragrupamënc politics che á deposité so sëgn de lista.

Por les lîtes comunales dl Comun de Nöia Todëscia él gnü deposité pro la Presidënza dla Junta provinziala de Balsan chisc sëgns de lista de partis o ragrupamënc politics organisá che vëgn dá dant chiló dessot.

Al vëgn avisé che d'atri partis o ragrupamënc politics organisá ne pó nia adoré i medemi sëgns o sëgns che é ris da desfarenzié da chi dá dant dessura.

Balsan, ai 7 d'otober dl 2019

 

LE PRESIDËNT DLA PROVINZIA

DOT. ARNO KOMPATSCHER

Sëgns de lista