Le blasun

Le blasun

Le statut nü d’autonomia prevëiga tl articul 3, che la Provinzia de Balsan ais so blasun y süa bandira. Le blasun provinzial, che é gnü aprové al'unanimité dala Junta provinziala ai 30 de messé dl 1982, é gnü autorisé cun decret dl Presidënt dla Republica di 21 de merz 1983. Le blasun dl Südtirol ciara fora insciö “n vedl variöl cöce dl Tirol sön n funz d'arjënt, d'or cun la lënga cöcena y les spanges dles ares d’or”. Al é le variöl cöce dl Tirol dl ann 1370, sciöch’al é reporté sön l’alté dla capela de Ciastel Tirol.

Spligaziun storica

I blasuns provinziai vëgn do esperiënza chiris fora danter i blasuns dla dinastia di regnënc, che regnâ dandaìa te chisc raiuns. Insciö deröia le blasun de Tirol dala dinastia che s’â lascé jö incër l’ann 1150 te nosc raiun y che á tut l’inom dala localité de Tirol dlungia Maran, olach’ai â fat sö so ciastel originar. I grofs de Tirol á bele chirí fora incër l’ann 1190 le variöl cöce por so blasun. Chësc resultëia dal sigil de Albert III (1190-1253) y le corú dl variöl é bele da ciafé tla rima dl Cliperius Teutonicorum (1242-1249) dl canonich de Zürich, Konrad von Mure:

“Fert aquilam Tyrolis clipeus prestante rubore, que nigri pedis alias albente colore”
(Le scü blanch de Tirol á n variöl dal corú cöce scraiënt cun grifes fosces).

Le blasun dla pröma familia di regnënc é passé tres le matrimone dla fia de Albert III Adelheid, cun Meinhard III (Meinhard I de Tirol), le grof de Görz, tles mans di grofs de Tirol-Görz. Bele sot ai grofs de Tirol-Görz é le variöl cöce deventé le sëgn teritorial; do che la contea de Tirol é passada tles mans di Habsburger (1363) é le variöl deventé le tier dl blasun di raiuns dl Adej, dl Isarch y dl Inn.
Le variöl cöce cun les ermes d’or, cun la lënga cöcena y les spanges dles ares carateristiches d’or, cun la corona o zënza corona, é sté por secui alalungia le simbol dla contea de Tirol, plü tert dl prinzipat y ê tresfora da odëi sön le gran sigil di imperadus dl Sacher Impêr Roman y dl’Austria. La contea á tres albü tl cheder di raiuns ereditars dla Ciasa dl’Austria y plü tert tl imper austriach na autonomia particolara.

La bandira

La bandira

Aladô dl art. 3 dl Statut de Autonomia Nü á la Provinzia de Balsan-Südtirol le dërt d’avëi dlungia so blasun, ince na süa bandira. Deperpo che le blasun dla Provinzia é bele gnü aprové dl 1983, á la bandira impormó ciafé süa aprovaziun definitiva dales autorités competëntes a livel nazional tl altonn dl 1996. Sön domanda dla Junta provinziala (deliberaziun al’unanimité di 7 d’otober dl 1996) é la bandira gnüda aprovada cun decret dl Presidënt dla Republica di 22 de novëmber dl 1996.

La bandira dla Provinzia autonoma de Balsan-Südtirol é n drap blanch y cöce che á itamez le blasun dla Provinzia cun chësta scrita d’or ti trëi lingac: “Autonome Provinz Bozen Südtirol” (sön la pert blancia), “Provincia Autonoma di Bolzano-Alto Adige” (sön la pert cöcena) y “Provinzia Autonoma Balsan-Südtirol” (en pert sön la pert blancia y en pert sön la pert cöcena). Les perts de metal é indorades, incër la stangia él intorcoré sö na vëta de lüch dai medemi corusc dla bandira. Sön la piza dla lanza él le blasun dla Provinzia.

Spligaziun storica

I corusc blanch y cöce dla vedla bandira dl Tirol y dla bandira dl Südtirol vëgn, sciöche al é porater te de plü posć, dai corusc dl vedl blasun dl Tirol. Chësc blasun – n variöl cöce sön n funz arjenté (blanch) é gnü dé inant a corusc dal 1271-1286. La rafiguraziun plü vedla é l’afrësch tla capela de Ciastel Tirol che vá zoruch a chësc tëmp. Na descriziun olache al vëgn fat referimënt ai corusc, é da ciafé tla poesia dl blasun (Cliperius Teutonicorum) dl canonich Konrad von Mure incër l’ann 1250:
“Fert aquilam Tyrolis clipeus prestante rubore, que nigri pedis est alias albente colore”
(Le scü blanch dl Tirol á n variöl dal corú cöce scraiënt y dales grifes fosces).
Dal catordejim secul incà é les grifes y le bech dl variöl indorà.

Le sigil

Le sigil dla Provinzia de Balsan é aladô dl articul 3 dl decret dl Presidënt dla Junta provinziala di 20 de setëmber 1989, nr. 26 toron. Itamez él le blasun dla Provinzia y tl cërtl deforaia él l’iscriziun: “Autonome Provinz Bozen • Provincia Autonoma di Bolzano-Alto Adige”.

Al ti vëgn conzedü ala direziun generala, ales repartiziuns y ai ënc, ales intendënzes dles scores, ales direziuns scolastiches de düc i degres scolastics sciöch’ince ales direziuns dles scolines y a dötes les unites organisatives dla Provinzia le sigil autonomamënter.

Al ti vëgn conzedü ai ofizi dl’aministraziun publica tles localites ladines dl Südtirol, sciöche ince al’Intendënza ladina y ales direziuns dles scores tles valades ladines de düc i degres y ales direziuns dles scolines n sigil ti trëi lingac.

Le sigil vëgn reporté ala fin dl test di ac aministratifs dl Consëi provinzial y dla Junta provinziala. Por l’anuzamënt dl sigil é i impiegac responsabli, che stá a ce de vignöna dles unites organisatives.

Taché fora la bandira

Aladô de n decret dl Presidënt dla Provinzia vëgnel taché fora sön le frabicat, olache le Consëi dla Provinzia autonoma de Balsan-Südtirol á süa sënta, sciöche defora dal Palais Widmann, olache la Junta provinziala y le Presidënt dla Provinzia á süa sënta, a man ciampa dla bandira dla Uniun Europeica y dla bandira dla Republica taliana, che é itamez, la bandira dla Provinzia autonoma de Balsan-Südtirol, te chisc dis:

  • ai 7 de jená (Festa dl tricolore)
  • ai 11 de forá (Contrac Laterans)
  • ai 25 d’aurí (De dla liberaziun)
  • al 1. de ma (De dl laur)
  • ai 9 de ma (De dl’Europa)
  • ai 2 de jügn (De dla Republica)
  • ai 28 de setëmber (De dla revolta popolara de Napoli)
  • ai 4 de otober (De di sanc proteturs dla Talia)
  • ai 24 de otober (ONU)
  • ai 4 de novëmber (De dl’unité nazionala)
  • d’atres ocajiuns che vëgn stabilides da iade a iade dal Presidënt dl Consëi di Ministri.
Box 4

Le blasun dla Provinzia autonoma de Balsan-Südtirol vëgn taché fora adöm cun la bandira dla Republica taliana, la bandira dl’Uniun Europeica y la bandira dl Comun, sön i frabicac olache i organs colegial di comuns á süa sënta prinzipala, tratan sües sentades.Sön i frabicac olache les direziun dles scores á süa sënta, vëgnel taché fora la bandira dla Provinzia autonoma de Balsan-Südtirol ti dis de scora y di ejams, sciöche inće ti dis nominá dessura y sciöche descrit dessura.
Dales lîtes y dai referendums popolars vëgn la bandira dla Provinzia Autonoma de Balsan-Südtirol ince tacada fora sön i frabicac dles seziuns litales sciöche descrit dessura.
En ocajiun dla vijita de autorités o de delegaziuns statales o regionales, nazionales o forestes, po la bandira gní tacada fora sön le frabicat dla sënta dl Consëi provinzial, dla Junta provinziala y dl Presidënt dla Provinzia; aladô de ciun organn provinzial che i á invié. Sce le numer dles bandires da taché fora é per, spo vëgnel taché fora al pröm post la bandira taliana, spo chëra europeica, spo la bandira dl stat ghest o dla regiun ghest y ala fin la bandira dla Provinzia autonoma de Balsan-Südtirol. Sce le numer dles bandires da taché fora é döst, él al pröm post la bandira europeica, la bandira taliana é itamez, la bandira dla Provinzia Autonoma de Balsan-Südtirol é al ultimo post y les atres bandires itamez.
La responsabilité dla dërta esposiziun dles bandires, aladô dl articul 5 dl decret dl Presidënt dla Provinzia di 20 de setëmber dl 1989, n. 26, é dl consegnatar dl frabicat.
En ocajiun de manifestaziuns y de funziuns publiches, olache le Presidënt o i mëmbri dla Junta provinziala tol pert ofizialmënter en rapresentanza dla Provinzia, pol gní adoré la bandira dla Provinzia Autonoma de Balsan-Südtirol, che vëgn portada da dependënc provinziai che alda pro la forestala.