Jonta provinziela

La Jonta provinziela ie l organn esecutif dla Provinzia. La ie furmeda dal Presidënt dla Provinzia, da doi Vizepresidënc, un dla grupa linguistica tudëscia y l auter dla grupa linguistica taliana, y da n cer numer de assessëures. L Presidënt dla Provinzia y i assessëures vën litei dal Cunsëi provinziel te litazions defrëntes a vela sucrëta y a maiuranza assoluta di cumponënc dl Cunsëi. Danter i assessëures litei vëniel lità, for dal Cunsëi, i doi Vizepresidënc dla Jonta.

Presidënt dla Provinzia chir nsci ora l Vizepresidënt che dëssa l sostituì tl cajo de assënza o mpedimënt y partësc cun n si decret i afares danter i cumponënc dla Jonta provinziela. La cumposizion dla Jonta provinziela muessa vester aldò dla cunsistënza dla grupes linguistiches coche les resultea reprejentedes tl Cunsëi provinziel. Ma la reprejentanza tl Cunsëi provinziel ti possa unì recunesciuda ala grupa linguistica ladina nce n desvieda ala reprejentanza pruporzionela. Chësta ie na nuvità mpurtanta che ie unida njunteda cun la reforma dl Statut tres la lege costituzionela di 31 de jené 2001, n. 2, sciche nce la nuvità che nce pra la Jonta provinziela puderal śën fé pert persones che ne ie nia cunselieres provinziei. Per la litazion, for da pert dl Cunsëi provinziel, de chësta persones “da dedora” vëniel damandà na maiuranza plu cualificheda che no tl cajo de na litazion de n cumponënt dl Cunsëi, uel dì, la maiuranza de doi terzi y l cunsëns di cunselieres dla grupa linguistica nteresseda, tl lim di cunselieres che costituësc la maiuranza che sustën la Jonta provinziela.