Competënzes y finanziamënt dl'autonomia

Competënzes

Cun le secundo Statut d'Autonomia, che é jü en forza ai 20 de jená dl 1972 y che rapresentëia aldedaincö la fondamënta por la sconanza dles mendranzes tl Südtirol ti á le Stat surandé ala Provinzia de Balsan la competënza legislativa y aministrativa te na ligna de seturs partis ite ti trëi grups dles competënzes primares, secundares y terziares.

Sce cina ala reforma dla Costituziun dl 2001 gnô les competënzes dla Provinzia dades dant dal Statut te n catalogh por vigni setur nominé dessura, él dedô gnü ot le mecanism y fat le contrar: insciö él gnü y vëgnel cumpedé sö les competënzes legislatives dl Stat, por ejëmpl la politica estera, la defenüda, la materia fiscala, le sistem monetar, la segurëza publica, la iurisdiziun, y ala Provinzia ti él gnü atribuí la competënza legislativa por dötes les atres materies. Te chësc cheder mëss la Provinzia se möi al intern di confins dla Costituziun taliana, dl dërt comuitar y dles acordanzes internazionales.

I seturs olache la Provinzia á competënzes primares pó gní regolamentá cun sü provedimënc legislatifs. Les competënzs primares rapresentëia l'espresciun plü ampla dl'autonomia dla Provinzia. Al vel la limitaziun che al ne pó nia gní violé la Costituziun y i prinzips de basa dl ordinamënt iuridich talian, les oblianzes comunitares y les diretives fonamentales dles reformes economich-soziales dl Stat talian.

La Provinzia á competënza primara danter ater tla toponomastica (cun le dovëi dla bilinguité tla provinzia de Balsan), la sconanza dl patrimone storich-artistich, l'urbanistica, l'artejanat, la ciacia y la pëscia, les strades, le sistem de trasport publich, l'agricoltöra y le frabiché dles scores.

Ti seturs caraterisá da na competënza secundara, a chëra che al ti vëgn ince dit "concorënta", vëgn la Provinzia sotmetüda al respet di prinzips fondamentai che é tla legislaziun dl Stat. Chësc ó dí che le Stat regolamentëia döt ci che é sostanzial, la Provinzia le detai. La Provinzia de Balsan á competënzes secundares danter ater te chisc seturs: polizia locala, istruziun elementara y secundara, comerz, lernerat, eserzizi publics, igiena y sanité, adoranza dles eghes publiches (tut fora les gran derivaziuns por fins idroeletrics).

Le podëi legislatif dla Provinzia tles materies caraterisades da competënzes terziares vëgn limitada al'integraziun dles desposiziuns legislatives dl Stat. Te chësc cheder tomel ite les materies dl laur y dla surandada dl laur.

Assegnaziun dles competënzes
CompetënzaProvinziaStat
Cultura (biblioteches, museums, yi.i.) primara
Scolines primara
Scores secundara
Sozial  (ciases de palsa, assistënza, y i.i.) primara
Strades primara
Sanité secundara
Frabiché abitatif primara
Trasport publich primara
Turism primara
Artejanat primara
Comerz primara
Industria primara
Agricoltöra primara
Proteziun zivila primara
Parcs naturai primara
Sport secundara
Imigraziun statala
Defenüda statala
Polizia statala
Iustizia statala
Finanzes (scioldi, banches) statala

Finanziamënt dl'autonomia

Le bilanz dla Provinzia de Balsan fej fora atualmënter presciapüch 5 miliarg de euro al ann. Al vëgn alimenté dales entrades dles cutes che vëgn trates ite tl Südtirol. I 9/10 de chëstes entrades fiscales resta tl Südtirol, le rest vëgn mené inant a Roma.  

Cun i mesi finanziars dl bilanz provinzial vëgnel finanzié diretamënter dala Provinzia y nia dal Stat - a desfarënzia de n gröm d'atres Regiuns talianes - tröpes competënzes, danter ater le sistem dl'istruziun dala scolina cina al'université, le setur sanitar y chël sozial, la gestiun de döta la rëi dles strades statales y provinziales. Chëstes competënzes fej ince fora i majeri capitui de spëisa dl bilanz: le setur sozial y sanitar (presciapüch 1,6 miliarg de euro al ann), l'istruziun y la cultura (presciapüch 750 miliuns de euro), l’Aministraziun (presciapüch 600 miliuns de euro) y le finanziamënt di Comuns ( presciapüch 500 miliuns de euro).