Sistem litel

I cumëmbri dl Cunsëi provinziel vën litei dala populazion, i resta te si ncëria per cin ani y i vën crisc ora danter la zitadines y i zitadins che à cumplì 18 ani y sta tla provinzia de Bulsan zënza nteruzion da almanco cater ani.

Nchin tl 2003 univa l Cunsëi provinziel lità deberieda cun chël dla Provinzia de Trënt tl cheder dla veles regiuneles; la Provinzia autonoma de Bulsan y chëla de Trënt fajova pert dla Region Trentin-Südtirol, de chëla che l organ legislatif plu aut fova l Cunsëi regiunel. La persones litedes fova cundechël dantaldut cunselieres provinziei, y mé te n segondo mumënt univa chëles y chëi che fova unic litei tl Südtirol o tl Trentin asseniei respetivamënter ai Cunsëies provinziei de Bulsan o Trënt. Ma cun la reforma costituzionela dl 2001 ie la pruspetiva unida raideda y śën à la doi Provinzies n majer pëis ti cunfronc dla Region nce per cie che reverda la veles y les ie nsci la seves che ërsc su l'autonomia. A pië via dala veles dl 2003, defati, ne ie la/i cunselieres per l prim iede nia plu unides litedes/unic litei n iede sciche cunselieres regiunei y pona sciche cunselieres provinziei, ma al cuntrer sciche cunselieres provinziei y, de cunseguenza, nce sciche cunselieres regiunei. La situazion ie la medema per cie che reverda la scumenciadives legislatives per la mudazion dl Statut d'autonomia che toma śën danter la cumpetënzes di doi Cunsëies provinziei.