Scora da d’altonn: Tl Südtirol dai 7 de setëmber

Co che l’insegnamënt dess gní organisé por le proscim ann de scora é sté tl zënter de n’incuntada virtuala danter i rapresentanc dl Stat y dles Regiuns. La Provinzia laora por na soluziun autonoma.

Scora da d’altonn: Tl Südtirol dai 7 de setëmber (Foto: Usp)

Les modalités dl insegnamënt scolastich tl proscim ann de scora 2020/21 vëgn regolamenté tla Talia dal plann statal “Piano Scuola”. Porvia dl coronavirus é chësta tematica de gran atualité. Incö, vëndres ai 26 de jügn, él insciö gnü a se le dé n’incuntada virtuala dla conferënza Stat-Regiuns-Comuns (Conferenza unificata) danter i rapresentanc dles Regiuns y dles Provinzies autonomes por ci che reverda la proposta por l’ann de scora 2020/21.

Scomenciamënt ai 7 de setëmber – Zënza mascores

“Dötadöm sunse a öna cun la planificaziun dl Stat, mo i orun s’anuzé de nostes competënzes autonomes”, á dit le presidënt dla Provinzia Arno Kompatscher. Les scores y les scolines dess insciö mët man tl Südtirol ai 7 de setëmber. Le presidënt Kompatscher á ince sotligné, adöm ai rapresentanc dles atres Regiuns y dl govern, da garantí “n insegnamënt zënza mascores”. Al é gnü tut la dezijiun da regolamenté chësc aspet ala fin de agost, ince porvia dla situaziun epidemiologica. La proposta da fá ince scora la sabeda vëgn tignida en conscidraziun.

Dërt ala formaziun é fondamental

L’assessur por la scora ladina Daniel Alfreider á sotligné che ince por ci che reverda les scores y scolines ladines vëgnel lauré por arjigné ca döt por l’ann de scora che vëgn. “Nosc obietif é chël da scomencé regolarmënter cun l’insegnamënt te classa en presënza. Porchël laorunse fora dötaurela dötes les normes de segurëza nezesciares cun düc i interessá. La formaziun é n dërt fondamental por dötes les scolares y düc i scolars y al é nosc dovëi da garantí chësc dërt le plü inant che ara vá.”

Trëi opziuns desvalies

Ince l’assessur por la scora todëscia Philipp Achammer sotlignëia che al é fondamental “da garantí le dërt al insegnamënt a scolares, scolars, jones y jogn. Porchël un lauré fora n conzet che tól en conscidraziun trëi opziuns desvalies por le scomenciamënt dl ann de scora por ester arjigná ca a vigni nezescité”.

Garantí indô contac soziai

L’assessur por la scora taliana Giuliano Vettorato é ince a öna che “les mitans y i mituns adora indô le contat personal cun les insegnantes y i insegnanc y cun compagnes y compagns de classa. I un laoré cotan tles ultimes edemes adöm ince ales atres Reiuns por ti jí adicuntra ales esigënzes de formaziun de nostes mitans y de nüsc mituns. ”

USP/jw

Galaria dales fotografies