Coronavirus: Chestionar por zitadines y zitadins dles valades ladines

La Provinzia de Balsan mët a desposiziun n chestionar sön la situaziun generala tles valades ladines do l’emergënza coronavirus. L’assessur ladin Alfreider damana dötes y düc da fá para.

Coronavirus: Chestionar por i zitadins dles valades ladines. L’assessur ladin Alfreider damana dötes y düc da fá para.

Analisé la situaziun en general dles valades ladines y ince tl spezifich por ci che reverda  tematiches desvalies sciöche la scora, families, laur, mobilité y tröp d’ater: chisc é i fins dl chestionar realisé da pert dla Intendënza y Cultura ladina. L‘assessur por la scora y cultura ladina Daniel Alfreider sotlignëia che: “Le fin prinzipal é da damané do ala comunité ladina sciöche al é la situaziun do l’emergënza dl coronavirus. Les mudaziuns é stades tan granes che i orun aldí les impresciuns y les minughes dla jënt por inrescí sciöche la situaziun é. Sides por ci che reverda la situaziun cun l’insegnamënt digital, mo ince por families, por impreses y tl monn dl laur.”

Implü dessel gní ejaminé n valgönes tematiches che vá dales variables che condizionëia la didatica, les soluzions de sostëgn ales families che por deplü gaujes é en dificolté, a na pert de domandes sura la cultura ladina, insciö Alfreider. ​Mo ince en general por ci che reverda mosöres economiches, soziales y dla mobilité él important da savëi sce l’aministraziun provinziala á respognü bun ales ghiranzes locales.

Ince l’intendënta dles scolines y scores ladines Edith Ploner sotrissëia: “I sun drio a planifiché por ejëmpl ince l’ann de scora 2020/21 y i orun capí ci che é important por i geniturs, scolares y scolars y insegnantes y insegnanc. Le feedback é important por lauré inant, crësce y mioré inant”.

Al pó fá para dötes les zitadines y düc i zitadins dla Val Badia y de Gherdëna. Le tëmp a desposiziun ne é nia tröp, söporjö 15 menüc. “Mo al é tëmp invest dër bun, deache vignun pó dí la süa y i ciafun n’imaja complessiva por lauré inant”, dij Alfreider.

Le chestionar é da ciafé sot a: www.provinzia.bz.it/chestionar. La compliaziun é anonima.

USP/ASP

Galaria dales fotografies